2053/2024-2025

Aizawl the 13th September, 2024 : Vawiin khan School Education Minister Dr Vanlalthlana chuan Science Teachers' Association Mizoram (STAM) General Conference vawi 37-na Synod Conference, Aizawl-ah a hmanpui. 

Minister chuan he hunah hian thusawiin zirtirtuten tunlai thiamna hrethiam a zirtirna kalpui a țul thu sawiin Artificial Intelligence (AI) hman thiam pawimawhzia a sawi a. Company-te pawhin mi tlem zawk ruaiin thawh chhuah tam zawk an nei thei a,  technology chhuak thar zel hmang thiam nih a pawimawh hle a ni a ti a, Zirtirtute chu țan la zel turin a fuih a ni. Minister chuan Zirlaiten thil thar ngaihtuah chhuah thiam theihna an neih theih nan chher an ngai tih sawiin zirlaite hian an thil zirah zawhna an neih tam theih nan fuih an ngai a, zawhna an neih tam hian an ngaihtuahna a vak zau thin a ni a ti.

Education Consultant Rev Dr K.Thanzauva pawhin thu a sawi a. Professional teacher te, missionary teacher te, ram hmangaihna tak tak nena thawk zirtirtute chungchang sawiin heng mite hian an thiamna zawng zawng nen an zirtir thin tih sawiin ram hmangaihna nena zirtirtu hi kan ramin a mamawh a ni a ti. Kan ram zirna hi kan siamṭha lo a nih chuan kan ram hi a tlu chhe dawn a, chuvangin siamṭhat hna thawh a ngai a ni a ti.

STAM General Conference-ah hian State Award to teachers dawng Pu Zothanliana leh Pu C. Lalhrilliana te chawimawina hun an hmang a, an adviser Rev Chuauṭhuama sunna hun an hmang bawk. Chawhnu lamah Artificial Intelligence chungchang an zirho a, Aizawl khawpui chhung leh pawn atangin memberte an  kalkhawm a ni.