Vawiin khan Samagra Shiksha buatsaih UDISE plus training Chanmari YMA Hall Aizawl-a neih chu School Education Minister Pu Lalchhandama Ralte-in a hmanpui.
   
Pu Lalchhandama Ralte chuan he hunah hian thusawiin School endik neih mumal lohna a rei tawh a, hei hi thar thawh tum a ni a, hemi atan hian lirtheite pawh lei a ni, a ti. Officer ten inspection leh monitoring an thawh mai bakah hian third party te pawh neih a tul thu a sawi bawk. School Education Department chu a del dul rei deuh tawh a, thawktu tam tak chu an inthlahdah nasa a, aikal la pawh an tam hle, zirtirtu ni si sumdawng ta lawp lawp te pawh an awm tia sawi an kai fo thu sawiin Education Minister chuan RTE-in a phut angin kil tinah zirtirtu indah ni mahse thenkhatin hlawh tlem zawkin qualified lo aikal an la a, zirna that ngaihna a awm lo tih sawiin thawk tak tak lova awm mai mai te chu insiam tha turin a chah a. A tul chuan thawk tha duh lote chungah talhfiak pawh lek a ni ang, a ti. Minister chuan khawvel hmasawn zelna karah thawktute chu in tuai thar zel a, tan la turin a chah a, UDISE plus chungchangah pawh centralin tih tur min tuk ang ang chu Mizoram lehkhathiam tamna ramah a tih theih lohna tur a awm lova, puanven sawi chhinga tan la turin thawktute a chah a ni.
    
Pi Esther Lalruatkimi, Commissioner & Secretary, School Education Department pawhin he hunah hian thusawiin thawktute chu an bial chhung theuh hrechiang turte, school-in sorkar atanga an dawn tur an dawng ngei em tih te finfiah thin turin a chah a,  thawktu mimal tinte chu an hnathawhin ram tan hmasawnna a thlen thei tih hre turin a chah a ni.
     
Pu Lalhmachhuana, State Project Director SSA & RMSA pawhin thu a sawi a, Data lak chu school tan a pawimawhzia leh data lak dik lohin nghawng a neih pawi dan a sawi a. Data a dik loh chuan school-in an dawn tur an dawn loh phah thei a, chuvangin CRCC te chu UDISE plus-ah ral atanga thawk mai lova, a hmuna kal chilh vek turin a chah a ni.
    
He UDISE plus training-ah hian School Education Minister leh Commissioner & Secretary bakah SSA leh RMSA SPD, State Project Office-a Officer te, District tina DPC leh Dy. DPC te, BRCC leh CRCC te an kalkhawm a, June 2019 chhungin Class I - XII data lak a ni dawn a ni.