1896/2023-2024

Vawiin khan School Education Minister Pu Lalchhandama Ralte chuan Vairengte-a Samagra Shiksha Higher Secondary School Science Stream building sak thar a hawng.

Minister chuan he hawnna hunah hian thusawiin sorkarin zirna tihhmasawn nan theih tawp a chhuah a, Serlui bialah pawh zirtirtu țhahnem tak dah belh an ni a, Zirtirtu hna lakah a thiam leh fit ngei lak țhin an ni a ti. Tunlai khawvel hmasawn zelah Science thiamna a pawimawh a, Vairengte khawtualah Science zir theihna a lo awm ta chu lawmawm a tih thu a sawi a, building satu pawhin a sa țha a, sak zawh hun tura ruatah a sa zo thei a ni a ti. He zirna in thar hi Zoram fa duhawm tak tak hring chhuak turin duhsakna a hlan a ni.

Minister chuan Vairengte khaw mipuiten party thinlung dah țhaa ramri buaia hma an lak țhinnaah lawmthu a sawi a. Thu tisaa chantir țhintu, kawngkapui vengtu, Zoram mipuiten an thlir țhin an ni a ti. Tun sorkarah hian Covid hripui avangin Mizoram sorkarin central ațanga sum a hmuh tur cheng vaibelchhe sangthum bawr hmuh loh a ni a, chutih laiin covid hripui bakah lirnghing, ramri buai, vawk pul hri leng ten min tibuai a, a chhunga chengte bakah țhenawm ram ațanga raltlan singnga dawn chawm an ngai bawk a. Chutiang karah chuan Mizoram sorkar hi tluang takin a kal a ni a ti.

Minister chuan sum leh pai awm ang ang zirna atana hman hi sorkarin a tum a, sorkar hmalakna chin chu mipui pawhin thlawp se a duh thu a sawi. Minister chuan zirtirtute chu mipuite țawiawm phu ni turin a sawm a, zirlaibu piah lamah zir tlak zirtirtu ni tur leh zah phu ni turin a chah a ni.

Pu Lalrinsanga Ralte Bialtu MLA & Vice Chairman Rubber & Allied Crops pawhin thusawiin tun sorkarah zirnain hma a sawn nasaa, Vairengte mipui leh zirtirtute pawh sorkar chungah an lawm tih sawiin duhthusam ni lo mah se zirtirtu pawh an indaih ta a, sorkar sikul pawh naupangin an bawm a, a lawmawm hle a ni a ti. Sorkarin Samagra teacher te hlawh a tihsan te leh an ngheh dan tur kawng a ruahman te hi a lawmawm hle a ni a ti bawk. Pu Lalrinsanga Ralte chuan sorkarin a bial chhung khua te tan theih tawp a chhuah tih sawiin mipuite chu kum 5 chhunga an bial chhunga sorkar hnathawh en turin a fuih a ni.

Vairengtea HSS Science Stream building sak thar hi floor 4 a ni a, sum sen zat chu Rs 1,57,77,150.65 a ni a, a dung 75ft, a vang 23ft a ni. A pumpui zau zawng hi Sq.m 158 a lian a ni. Principal room, staff room, class room-2, library, laboratory room - 3, art & craft room te a awm a ni. Vairengte-a Samagra Shiksha Higher Secondary School building sak thar hawnna inkhawm hi Kolasib District Education Officer Pi K. Lalsiamliani'n a kaihruai a, Samagra Shiksha officer țhenkhatte, khawtlang hruaitute, zirlaite leh zirtirtute an tel a ni.