2177/2024-2025

Aizawl, the 24th September, 2024: Tukin khan School Education Minister Dr. Vanlalthlana, Aizawl North-II bialtu MLA ni bawk leh Land Revenue & Settlement Minister Pu B. Lalchhanzova te chuan Ramhlun Sports Complex-a Sawrkarin ram a lo theh tawh chu a hmunah tlawhin hemi chungchang hi khawtlang hruaitute an sawipui. 

Ramhlun Sports Complex Veng hian kum 2013 khan lei min nasa tak an tuar a. Anni bakah hian hemi kum veka Laipuitlang leh Ramhlun Venglai lei min avanga in leh lo chan an awm bawk a. Heng lei min avanga in leh lo chante tan hian sawrkar chuan Ramhlun Sports Complex veng chuan hnuaia ram chu ruahmansakin in hmun tur thehin a lo teh felsak tawh a ni. 

Ramhlun Sports Complex Vengthlanga inbengbel tam ber, in leh lo chantate hian an LSC hmasa chu sawrkar hnenah an lo hlan (surrender) tawh a. In hmun tur theha teh fel ni tawh mah se, in hmun lehkha house site pass emaw, LSC emaw an beisei anga an neih mai theih loh avangin bialtu MLA leh Revenue Minister-te hi hma lakpui turin an ngen a ni. 

Heng lai hmuna chengte'n LSC an neih vat theih nan a tul anga ramrite enfel a, ram neitu tur dik takin ram an neih theih nan leh, a rang thei ang bera LSC pek chhuah a nih theih nan sawrkar chuan hma lak a tum thu he hunah hian tarlan a ni. 

Minister-te hi Pu V. Lalduhzuala, Director, Land Revenue & Settlement Department leh Pu Lalsanglura, Settlement Officer, Aizawl-te'n an tawiawm a ni.