2178/2024-2025

Aizawl 24th September, 2024 : Pu Lalnghinglova Hmar, Sports & Youth Services Minister hovin vawiin khan Vanapa Hall, Aizawl-ah National Service Scheme (NSS) Foundation Day vawi 55-na hman a ni.

Khuallian Sports Minister chuan NSS thupui keimah ni lovin nangmah (not me but you) tih chu a Pathian thu hle mai a. NSS volunteer te thisen unit pe tam ber an ni chu a ropuiin midangte tan malsawmna ni zel turin a chah a. Kan hnathawhna adopted village-ah danglamna a thleng em tih chu chona-ah ngaiin keimahni inenlet a, tan kan lak a pawimawh hle a ni a ti. Danglamna thlentu kan ni em tih kan inngaihtuah a, kan lo ni lo a nih chuan statistics tipungtu satliah mai kan ni thei a ni tiin NSS Volunteers te chu an ngaihdan an thlak danglam ngam angem? An thil chin tha lo te an thlak danglam ngam angem? tih inzawt theuh turin a chah a ni.

Tunlai mila inthlak danglam a pawimawh thu sawiin tunlai khawvel chu mi thiam bikte khawvel a nih angin an thiltih apiangah mi bik nih tum turin NSS Volunteers te chu a chah a. Tum nei rana an zirlaite zir chhuak tur leh nakin huna an inchhir loh nan Social Media a tawk chauha hman dan thiam turin a chah bawk a ni.

Minister hian NSS Annual report 2023-24 a tlangzarh nghal bawk.

Pu F. Sangvuana, State NSS Officer cum Deputy Secretary, NSS Cell, Mizoram report pein tunah hian NSS volunteers 30100 awm mekin Mizoram zirna inpui college 29 leh Higher Secondary School 72-ah NSS unit 301 din tawh a nih thu a sawi a. 2023- 2024 chhungin thisen unit 4900 pek niin thisen pek tam lamah pakhatna dinhmun an hauh mek a. NSS volunteers te'n an hnathawh public water point, Vantlang Inthiarna, luikawr leh Vantlang shed te tifai leh siam hnatlang  vawi 50 vel an neih thu a sawi a ni.

He hunah hian khuallian hian NSS chawimawina chi hrang hrang hlanin Appreciation Certificate Pu Joseph Vanlalhruaia, NSS Programme Officer, Synod Higher Secondary School, Aizawl, National NSS Programme Officer Awardee hnenah leh Lifetime Achievement Awardee, Dr.A.J. Rajan, NSS Programme Officer, St. John's Higher Secondary School, Kolasib hnenah a hlan a. Voluntary Blood Donation 2023-24 College Category-ah pakhatna Pachhunga University College, thisen unit 732 petu hnenah Certificate leh Rs. 5000/-, pahnihna Govt. Hrangbana College, thisen unit 451 petu hnenah Certificate leh Rs. 3000/- leh pathumna Govt. Aizawl College, thisen unit 424 petu hnenah Certificate leh Rs. 2000/- a hlan a. HSS Category-ah lawmman pakhatna Synod Hr.Sec School, thisen Unit 276 petu hnenah Certificate + Rs. 5000/-, pahnihna Helen Lowry Hr.Sec School - thisen unit 93 petu hnenah Certificate + Rs. 3000/- leh pathumna Govt. Zemabawk Hr. Sec School, thisen unit 83 petu hnenah Certificate + Rs. 2000/- a hlan a. Hei bakah hian State NSS Award 2023-24 Dr. Zothanpuia, Programme Officer, Pachhunga University College hnenah Trophy + Rs. 20,000/-, C. Malsawmtluanga, Volunteer, Govt. Serchhip College hnenah Trophy + Rs. 10,000/- a hlan bawk a ni.

Vawiin NSS Foundation Day hmanna-ah hian Prof. Benjamin L. Saitluanga, Programme Coordinator, NSS Cell, Mizoram University chuan kalkhawmte lawmna thu sawiin Dr. K. Vanlaldinpuia, Programme Officer, NSS Pachhunga University College chuan lawmthu sawina a nei a ni.