2179/2024-2025

Dated Serchhip, the 24^th September, 2024: September thla chhunga Poshan Maah hmanna kal zelah vawiin khan Serchhip ICDS Project buatsaihin CDPO Conference Hall, P&E Veng, Serchhipah Fruit Festival cum Sale neih a ni a. SWTA & WCD Joint Secretary Pi Zonunthari chu khuallian a ni.

Pi Zonunthari chuan naupangten chaw tha kham khawp eia nun bul an tan theih nan zirtirna tha inpe a; anemia laka nu naupai, nau pawm leh tleirawl te venna tur leh, eitur hrisel ei kawnga mitinin hma kan sawn zel theih na turin POSHAN Maah hi hman a ni, a ti. Nutrition tha avangin naupangin natna an do theihna a lo pung a, an thangduang a, lehkhazirna kawngah pawh hma an sawn chak, a ti a; naupang kum 6 hnuailamin in lama an ei bak Anganwadi-a ei tur tha an ei thin te hi hriselna atan a tha em em a, Central Sawrkar bultumin nutrition tha a thlawna kan dawng thei zel hi kan vannei hle a ni, a ti. Eitur tha hi thil manto tak a ni kher lo a, Mizoten kan tharchhuah thlai hring te leh thei te, kan ban phak maia awm chuktuah huana kan tharchhuah te hi a hrisel em em a ni tih hria a, ei tur tha ei kawngah hmasawn tum theuh turin kalkhawm te a sawm a. Poshan Maah chu Department pakhat hmalakna avanga hlawhtling thei a ni lo va, line department hrang hrang te nena thawhhona leh mipui te tawiawmna avang chauha  hlawhtling thei a ni tiin thawhhona tha nei zel turin khullian chuan a sawm a. Fruit Festival hlawhtling taka buatsaih a ni chu lawmawm a tih thu sawiin, chin chhunzawm zel tlak nia a hriat thu a sawi bawk a ni.

Poshan Abhiyaan hi March ni 8, 2018 khan India Prime Minister in a hawng a, Mizoramah pawh hemi ni vek hian hman tan ve nghal a ni a. He mission hian a tum ber chu naupang zingah thanthu (stunting) te, taksa rihna leh san zawng nena khaikhina zang lutuk (underweight) te, nausen pianghlim buk zang lutuk te,  chaw tha hmuh mumal loh avanga nu naupawm leh tleirawlten thisen tlakchhamna (anemia) an vei thin te a lo rem theih nan Anganwadi Centre kaltlanga naupang enkawl leh zirtir te a tel a ni. 

Eitur tha ei inzirtina Poshan Maah hi September ni 1 atangin Serchhipah hman tan a ni a. A kar khatnaah Infant and Young Child Feeding inzirtirna hun hman a ni a; a kar hnihnaah anemia test neiin Health Department nena tanghoin naupang 700 bawr vel test an ni a; a kar thumnaah Indigenous Sports neiin Serchhip Field Veng YMA Chhang te nen hun an hmang a; a kar tawp berah hian Fruit Festival buatsaih a ni ta a ni.

Fruit Festival hawnna programme Pi Caryll Lalpari, CDPO, Serchhip ICDS Project chuan a kaihruai a. Dr Lalnunsangi Pachuau, Medical Officer (AYUSH), District Hospital, Serchhip chuan presentation neiin thei hrisel ei dan tur te leh mihring taksa hrisel nana hna a thawh dan te chipchiar taka zirtirna hun a hmang a ni.

Ni khat awh Fruit Festival cum Sale-ah hian thei chi hrang hrang leh thei atanga siam chhuah jam, juice, squash leh chhang chi hrang hrang te lei tur a awm a. Zotui Orange Producer Company  te, Lellen Amla Processing te, S& R Food te, Darei Banana Food Processing Industry te, Kimkim Food Proecessing Industry te an tel a ni.