2180/2024-2025

Dated Kolasib the 24th September, 2024 : Vawiin khan Kolasibah District Urban Development & Poverty Alleviation Department (UD & PA) Department hmalakna in Faina inzirtirna Campaign - 'Swachhata Hi Seva' hman a ni. 

India ram Sawrkar laipuiin Faina beihpui a thlakna 'Swachh Bharat Mission' kal zelah September ni 15 atanga October ni 2 thleng daih tur Faina chungchang inzirtirna leh hmalakna Programme 'Swachhata Hi Seva' hi India ram hmun hrang hrangah kalpui mek a ni a. Hemi Programme denchhen hian vawiin khan Kolasibah pawh District Urban Development & Poverty Alleviation Department (UD & PA) Department kaihhruainain School zirlai naupangte nen 'No Tolerance for Single Plastic Use, No Tolerance for Littering/Spitting & Cleaning of Black Spots Day' hman a ni. 

He hun hi St. John's Higher Secondary School, Venglai, Kolasib School tualzawlah hman a ni a. District Urban Development Officer, Pi Josephine Zonunsangi chuan hun kaihruaiin School zirlai leh mipui kalkhawmte hmaah thuchah a sawi. Pi Josephine Zonunsangi chuan Faina hi mihring nuna zirlai pawimawh tak a nih thu sawiin, faina tello chuan zirna chu zirna hlawhchham a ni a ti a. Zirlaite chu chhuan lo la awm zel turte tana thiamna leh zirna hlanchhawngtu tur an nih angin, faina pawimawh zia hriaa, a taka nunpui chu an mawhphurhna lian tak a ni thu a sawi a. Mizoram Sawrkar leh Central Sawrkarin Faina kawnga hma a laknaah hian mitinte'n palai hna kan thawh thu a sawi bawk. 

He hunah hian Father Andrew Lalbiakfela, Principal, St. John's Higher Secondary School chuan kalkhawmte hmaah Faina leh zirna inzawmna sawiin, faina chu changkanna kawngah hmahruaitu a nih zia leh lehkhathiam anga mihring kan in tehna ah pawh faina hian hma a hruaitu a sawi a.  "Fai hi Pathian anna a ni" tiin Father Andrew-a chuan Faina ngaih pawimawh hi ringtu kan nihna ang pawha kan mawhphurna  a nih thu a sawi.  

Pu Thomas D. Lalengliana, President, Sub-Hqrs YMA pawhin thusawiin Faina chu rilru hrisel leh thianghlim nen a inzawm thu a sawi a. Faina hian mimal taksa hriselna bakah khawtlang hrisel a siam thu a sawiin, khawtlang leh ram nuam siam turin Faina ngaih pawimawh a tul thu a sawi. 

Vawiina Kolasiba 'Swachhata Hi Seva' Campaign hmanna pual hian Kolasib khawchhunga khawtlang hruaitu Village Council Member-te leh St. John’s Higher Secondary School leh St.Maria Goretti’s School zirlai thahnem takin khawchhung tihfai hnatlang an nei nghal  a ni. 

'Swachhata Hi Seva' hi India ram Sawrkarin 2017 atangin ram pumah a hmang tan a. Kumin 2024 a Thupui chu Swabhav Swachhata – Sanskar Swachhata niin, he Campaign hian a tum ber chu India rama cheng mitin te Faina kawnga mahni ngei an thawhchhuahna hi a ni.