Vawiin khan School Education Minister Pu H. Rohluna leh Parliamentary Secretary Pu Joseph Lalhlimpuia ten School Education Department hnuaia Education Centre sakna tur Aizawl DC Office bula mi chu a hmunah an tlawh.

DC Office bula School Education building Assam type tuna la ding mek chu kum 1952 a sak tawh a ni a, UT hnuah mamawh belhna avangin a thlang lamah Assam type bawkin sak belh leh a ni. Tun hma chuan he building hi Education Department Directorate atan hman thin a ni a, Zarkawt Mc. Donald Hill a Directorate building thar sak a nih hnuah DEO/SDEO office atan hman zui a ni ta a ni.

Education Centre sak thar tur hi cheng vaibelchhe 8.8 seng sak tur a ni a, Special Plan Assistance atanga sak a ni dawn a. Ruahman dawn chuan floor 7 a awm dawn a, DEO Office bakah SDEO pahnih Office atan hman theih a ni dawn a. A chung berah Video Conference Hall leh Conference Hall pangngai mi 100 thut theihna a awm ang a, Floor 7 area belhkhawm chu 2712.5 sq.m a zau a ni dawn a, floor tin hi 387.5 sq.m a zau a ni dawn a ni. Floor khat leh a chanve chu Car Parking atan hman a ni ang a, Car 30 vel dah theih a ni ang.

Education Department Infrastructure tha tawk tawh lo tak tak siam tha tura sorkar sum harsatna kara Education Centre, Office leh Conference Hall awm nghal tur sak theih tura ruahman a ni ta mai hi Chief Minister Pu Lal Thanhawla, Education Minister Pu H. Rohluna leh Parliamentary Secretary Pu Joseph Lalhlimpuia te chungah Education Department thawktute an lawm hle tiin an sawi a ni.