Vawiin Jan 15, 2020 khan School Education Minister Pu Lalchhandama Ralte leh Pu L Thangmawia MLA leh Vice Chairman HRD chuan Lengteng bial chhung Saichal, Hliappui leh Kawlkulh khua te an tlawh.

Minister chuan heng khuaah te hian amah lo hmuaktute hmaah thu sawiin sorkarin hun reilote chhungin School Education-ah hmasawnna nasa tak hmuh tur a awm a ni a ti a. Hmun tinah zirtirtu indaih lo thawm hriat tur a awm a, MLA ten an fund hmangin zirtirtu an ruai sup sup a. Tunah erawh chuan zirtirtu indaih lohna phuhruk nan hian zirtirtu sang chuang lak a lo ni ta a, indaih lohna zualpui phuhruk a lo ni thei ta a ni a ti a. Hmasawnna hna chi hrang hrang hi tumkhatah tih vek theih a ni lova, a tah tawlin sorkarin a thawk zel dawn a ni a ti a. Khawtlang hruaitute chu naupang hunpui an exam leh hun pawimawh te zahsaka zirlaite tan boruak tha siam turin a chah a. Khawtlangin zirna ngaih pawimawh hi ram hmasawn nan a pawimawh hle a ni a ti a. Mi tumruh, taima leh rilru neite chu an hlawhtling thin tih sawiin zirlai kalkhawmte pawh thingtlanga awm mah nise, dinchhuahna kawng a awm tih hre reng turin a chah a ni. Minister chuan hmasawnna kawng hrang hrang an thawhah sorkar chu thlawp tlat turin mipuite a sawm a ni.

Pu L.Thangmawia MLA leh Vice Chairman Human Resource Development pawhin heng khaw hrang hranga mipui pungkhawmte hmaah hian thu a sawi a. Sorkarin kawngpui chhia chu a ngaimawh a, mutmawh hnarmawhah a nei a ni a ti a. Kawngpui siamthat nan hian DPR te pawh central lamah thehluh a ni a, bawhzui nghal zel a ni bawk a. Chung zingah chuan Saitual leh Saichal inkar kawngte pawh a tel a ni a ti. Tun hnaiah MR teacher lakah a theih chin chinah a khaw mi lak an ni te, a thiam thiam an la te hi ram tan a lawmawm hle a ni a ti. Pu Thangmawia chuan zirna hi ram hmasawnna bul leh mihring hmasawnna pawimawh ber anih avangin thingtlang lam pawhin tan lak a ngai hle a ni a ti.

Minister leh MLA te hi Pu C.Lalnuntlanga Executive Member SHC leh School Education Department-a officer ten an tawiawm a ni.

Attachment

  • Loading attachment...