Law & Judicial, Transport, Environment, Forests & Climate Change leh Parliamentary Affairs changtu Minister Pu TJ Lalnuntluanga chuan vawiin khan Khawzawl leh Saitual tlawhin a department enkawlte hmunhma tur a enfiah. Minister hian Khawzawl Wildlife Division Office, District Bawrhsap Office leh P&E Division Office-te a tlawh bakah Khawzawl Joint Village Council-in Transport Department Office leh District Court sakna tura ram an ruahmante leh DC Office sakna tur a ruahman, BDO Complex-te a hmunah tlawhin a enfiah a. Tlai lamah Saitual thleng thlain Department hmunhmate Official leh khawtlang hruitute nen an enfiah a ni.

Pu TJ Lalnuntluanga ho hian Khawzawl DC Conference Hall-ah Official leh khawtlang hruaitute nen inkawmhona leh inrawnkhawmna hun neih a ni a Khawzawl District Bawrhsap Pu H. Lianzela kaihhruaia hun hmanah hian Minister chuan thu sawiin, Master Plan tih fel loh chuan khaw chhung a tichepin khawsak a harsat phah a ni, a ti a. Sawrkar Office hrang hrangte pawhin ram tam tak kan daidar a, environmenal issue thlengin a khawih tawh a ni, a ti a. Urbanisation Scheme hnuaiah hmasawnna tur tam tak a awm a, Sawrkarin Rurban a kalpui chho leh dawn a ni tiin, Master Plan mumal tak a awm loh chuan hmasawnna tur emaw kan tih hian khawpui chep takah kan insiam phah thei zawk dawn a ni, a ti a. District thar mamawh hrang hrangte chhawpchuah zel anih theihna tura hmalak zel anih thu a sawi a. Transport department leh District Court hmun tur chu mipuite mamawh tak mai anih avangin khawpui laili, mipuite tana dawr leh tlawh awlsamah awm se tiin, khawtlang hruaitute pawhin chutiang hmun tha chu ngaihtuah thei se a duh thu a sawi bawk.

Khawzawl DC Conference Hall a meeting neih zawh hnu hian District Court hmun tur leh Transport department hmun turte a hmunah kalin Minister hian a en nghal a. Minister hi Pu H.Lianzela, DC Khawzawl; Pu R.Lalrammawia, Director, Transport Dept; Pu Thomas Lalrammawia, Dy. Secretary, Law & Judicial; Pu Lalrinawma, Under Secretary, Transport Department, Sawrkar official leh khawtlang hruaitute'n an tawiawm a ni.

Minister hian tlai lamah Saitual thlengin SDO Sadar Pu R. Vanlalsawma leh Official dang te’n an lo dawng sawnga. DC Conference Hall-ah inrawnkhawmna neih anih hnuin Transport Department leh District Court sakna tur hmunhmate Official leh khawtlang hruaitute nen an enho a ni.