Vawiin khan Pu K Lalrinliana, Minister of State for Fisheries Department chuan Kolasib district huam chhung a Fisheries hmalakna hrang hrang te a hmun ah kal in a enpui a, sangha chi tha tharchhuah nana hmalakna kal mek Blue Revolution hnuaia Hatchery Unit, Zero point a sak mek te, Cage Culture kalpui chhunzawm nana Serlui B tuikhhuah a hmalakna te leh Ice Plant Bilkhawthlir te a tlawh a, sangha tharchhuak tute mamawh khawp vur siamchhuah a nih theih nan Fisheries department a thawktute nen harsatna hrang hrang awm te chinfel dan tur an sawi ho.

Minister Pu K Lalrinliana chuan Fisheries Department leh mimal thahnemngai leh hmasawn tak tak tum te hmalakna zar ah Hatchery Unit, Zero point, Bairabi road a sangha chi tha, Mizoram chhung ngei a tharchhuah a ni tur chu lawmawm a tih thu sawiin he hmalakna hi sangha leh sangha chi tha a kan ram kan intodelh theihna kawng pawimawh tak a nih thu a sawi.

Minister chuan Serlui B a Cage culture chhunzawm nana sangha chhuah tur te endikin, Sangha chi tha duh ang zat a awm loh avang leh Cage culture atan a khawi turin sangha awm te chu a lo la lian tawk lova. Cage culture hlawhtling tak a kalpui a nih theih nan thawktute nen hun remchang dangah sangha note te chu chhuah a nih zawk nan ruahmanna an siam. Bilkhawthlira Ice Plant tlawhin Sangha tharchhuaktuten tangkai taka an hman a, mamawh ang zat vur siamchhuah a nih theih nan Fisheries department hotute nen hmalak dan tur a sawipui bawk a ni.

Hatchery Unit, Zero Point, Bairabi road ah hian tum khat ah sangha chi nuai 20 atanga 24 thleng tharchhuak thei tur a ruahman a ni a, Central Institute of Freshwater Aquaculture (CIFA) atangin sangha chi tha, Jayanti Rohu, Amur Carp leh Catla te khawi mek a ni a, heng sangha tha chi te hi kum 2 chhunga puitling hman tur a beisei a ni.

Minister hi Pu F Vanlallawma, Director, Fisheries Department, Pu Lalrochhara, Deputy Director, Pi C Lalparmawii, DFDO leh Fisheries a thawktuten an tawiawm a, Zofishfed a hruaituten an telpui bawk a ni.