Vawiin khan Lunglei ah School Education Minister Pu H.Rohluna hovin Education Campaign neih a ni a, Minister hi Parliamentary Secretary Pu Joseph Lalhimpuia leh Department Officer ten an tawiawm.

Minister Pu H.Rohluna chuan thusawiin, School Education Department hi a hnathawh a pawimawh a, hmathlir nan te, hnam siamna atan te, he Department hi a pawimawh hle a ni a ti a. School luh tan ni khan Dpartment Officer te nen hma kan sawnna a nih beiseiin kan mawhphurhna leh thahnemngaihna tur in hrilhhriat nan hun kan hmang tawh a. Zirtirtu senior chuan khawtlang leh ram tana chhuanawm tak tak Doctor, Engineer, Sakhaw rawngbawltu leh ramhruaitu inchher chhuak a, a chhuanawm hle, chutih laiin mi tlemte titha duhlo an awm tih kan hria a, chutiang tlemte zinga tello turin zirtirtute ka sawm a ni. Zirtirtute chu naupang nunzia leh an background te hriat tuma chumi mila zirtirna hna kalpui turina fuih a. Minister chuan zirlai naupangte hi zirtirtute tan mi pawimawh an ni a, anmahni avanga zirtirtu ni thei in ni a, an tan zahtlak, thiantha leh hruaitu ni turin a fuih bawk, khawvel hmasawnna thil thar lo chhuak te naupang ten an man ve zel theih nan lo in update turin a fuih a, zirlaite enkawl kawngah nu leh pate nen tanho dan kawng ngaihtuah zel turin a chah a, Parents Meet te pawh a khat tawk a buatsaih a tul thu a sawi. Zirtirtu hi hna zahawm a ni a, zirtirtu ni tur chuan thiamna bik neih a ngai. Sorkar School a thawk turin Central sorkar leh state sorkar in a duh dan angin sorkar school ah trained Teacher lo chu kan la tawh dawn lo a ti. Zirtirtu training hi sorkar in a ngai pawimawh a District tinah DIET te pawh recognised vek tawh a ni a ti bawk. Zirtirtu ni awm reng a, nung tur leh incheinaah pawh fimkhur turin leh ruihtheih thil laka fihlim turte in a chah a ni. zirtirtu ruihchingte chu sorkar in a enzui zel anga, inthenthianghlim te ala tul mai thei a, mahni hna aia sumdawnna leh thil dang ngai pawimawh te sim turin a chah a, inpekna thar nen he rawngbawlna hi Pathian rawngbawlna a ni tih hre thar theuh turin a fuih bawk.

Parliamentary Secretary Pu Joseph Lalhimpuia pawhin thusawiin, thil tha leh chhuanawm te hi kan ti ve thei tih in hre turin a chah a, Mizoramin kan la neih ngailoh Hostel Rules kan nei tawh a, a duh duhin Hostel din a theih tawh loh, danin a phal angin din a ngai tawh dawn a, a duh duhin rem leh rem lova an din hi kan phal tawh lo a ni a ti. Board exam ah Class X leh XII Integrated evaluation scheme hman a ni dawn tih a sawi a. Zirlaiten ziaka chhanna ngawt ni lovin internal mark a nei tawh dawn a, zirtirtute mark pek in awmzia a nei tawh dawn a ni a ti. HSLC Examination ah selstion test neih tawh loh tur tih Minister in a puang a, zirtirtute tangrualin kumin ah chuan private candidate an tlahniam ta a chuti chung chuan pass parcentage zaa pathum dawnin a sang a, a lawmawm hle a ni a ti. Kumdanga zirtirtuten hlawhbi kim an neih hleih theih loh chu budget ah hlawhbi kim kan nei ta a, senior leh selection grade te, promotion te a hunah kan nei ta a, hengte hi tun kum reilote chhunga kan neih a ni a, a lawmawm hle a ni a ti bawk. Education Centre Aizawl a sak mek te, Guest House Lunglei a lungphum kan phum te, Serchhip a Education Complex sak mek te hi hmasawnna chhuanawm tak a ni a ti. Zirtirtute zingah mahni school compound hliday ah pawh hauh tlat veng tlat te naupang damlo kan kuala tawngtai sak thinte in awm a, kan chhuang che u a ni a ti, chutih lai karah titha duhlo tlemte awm hian zirna a ti hmelhem tih a sawi bawk. Pu Mahima chuan sorkar hnathawk zaa 27 te hi school education a thawkte an ni a ti a, kawng hrang hrangin hma kan sawn zel a, thawktute i tangrual ang u a ti a ni.

He Education Campaign hi Pu Pu K.Lalrintluanga Addl. Director kaihhruaiah hian Addl.Secretary Pu Lalzirmawia Chhangte pawhin thu a sawi a, he campaign ah hian Primary atanga Higher Secondary School zirtirtu Lunglei khawpui ami te an tel a ni.