Sports & Youth Services Department huaihawtin  Sports discipline hrang hrang leh Youth Services - Scouts & Guides, Adventure, NCC, NSS, NYK, YHAI leh Mizoram State Sports Council hmangin thisen pek runpui ‘Voluntary Blood Donation Drive’ Mizoram district zawng zawngah ni 6th-8th September, 2017 chhung hian neih ni dawn a. He thisen pek runpui neih tur hi vawiin khan School Education Minister leh Vice-President, Scouts & Guides Mizoram Pu Rohluna’n Aizawl Civil Hospital-ah a hawng.

Sports & Youth Services Department Voluntary Blood Donation hawnna inkhawm SYS Director Pu Zothanmawia kaihhruaiah Khuallian Pu H.Rohluna chuan Sports discipline hrang hrang leh Youth Services kaltlangin mamawhte tan thisen an pek tur hi a lawmawm hle a, midangte tana malsawmna thlentu nih hi Mizo nun zemawi leh Kristian nun nen pawh a inmil hle a ni, a ti. Mizo thalai tam tak ruihtheih thil tih vanga thisen pe ve thei lo an awm a, ruihtheih thil an khawih avanga natna hrang hrang an kai a, midangte tan thisen pe thei lote pawhin an nun siamthatna chang hria a, an vanglai hun an hman mekah midangte tan malsawmna ni ve thei turin a fuih bawk. SYS Department hmalakna hi vawi khat mai ni lovin, a bultanna chauh nise; midangte pawhin pian champha, inneih champha leh mimal hun bik hriatrengna atan thisek pek hi in tihhmuh tur thil tha tak a ni, a ti a. Blood Bank-ah thisen khawl sa a lo tlem changin AVBD ten chanchinbu kaltlanga mipuite thisen pe tura an sawm thin chu mipui lamin ngaihven nachang hria a, thisen pek lam hi uar deuh deuh turin a sawm bawk.

Medical Superintendent, Aizawl Civil Hospital Dr.K.L.Remsanga pawhin thu sawiin Mizorama blood bank lian berah SYS peng hrang hrang ten thisen an rawn pe thei chu a lawmawm hle a; thisen mamawhna a sang zel ang bawkin a petu lam pawh an thahnem zel a, chumi tihlawhtling turin SYS lamin thisen pek runpui an rawn nei hi a vanneihthlak a ni, a ti. Mihring taksa hian thisen 4-5 litres a mamawh a, thisen Unit 1 hi 350ml ang a ni a, chu chu darkar 24 chhungin a insiam thar leh hman vek a ni tih a sawi a. Thisen pek hian heart attack leh stroke lakah min ven bakah cholesterol (thau chhia) a tihniam bawk a, thisen Unit 1 pekin 650 calories a paih chhuak zel bawk a ni, a ti. Kum 18 atanga 80 inkar hi mihringin a duh chuan thisen a pe thei reng a, mi 1 hian a damchhung hian vawi 168 a pe thei a ni tih a tarlang bawk. Midang nun chhan nana thisen pek hian mahni nun pawh chhan theih a nih thu sawiin Dr.Remsanga chuan thisen rawn pe reng rengte chu an thisen endik zel a ni a, natna hrang hrang - HIV, Syphyllis, Hepatitis, Malatria, adt. an vei leh vei loh hmuhchhuah a niin enkawl theih nghal an ni bawk, a ti.

SYS Director Pu Zothanmawia chuan Sports Department hnuaia mite chuan an thatlai hunah an thil nei hlu tak thisen chu a mamawhte tan a thlawna pek chu an tih tur pawimawh tak a ni a, Adventure leh NSS leh pawl dangte pawhin mumal takin an pe thin a, tun tum erawh chuan a huhovin District Headquarters zawng zawngah pek a ni dawn, a ti a. SYS buatsaihin Blood Donation neihah lo tel zawng zawng leh District hrang hranga hospital-a anmahni lo buaipuitute chungah Sports & Youth Services Department aiawhin lawmthu a sawi bawk.

District hrang hranga thisen pek hun tur chu :

Aizawl : 6th - 8th September 2017

Lunglei : 7th September 2017

Siaha : 8th September 2017

Lawngtlai : 7th September 2017

Mamit : 8th September 2017

Champhai : 7th September 2017

Serchhip : 7th September 2017

Kolasib : 8th September2017