Rs.50 lacs senga sak Kolasib District Library Extension Building chu vawiin khan Pu R. Romawia, Minister Art & Culture Department chuan a hawng.

Pu R. Romawia chuan electronic media ah thil chi hrang hrang chhiar tur leh en tur a tam avangin lehkhabu chhiar kan ngaihlu tawk ta lo ni a a hriat thu a sawi a, lehkhabu chhiar tam kan uar thar a tul a ni a ti a. Mizo tawng a thih mai loh nan a hmandan dik leh ziak dan dik kan zir ngun a tul thu sawiin, hemi kawngah hian nu leh pate pawn kan fate kan zirtir that a tul a ni a ti a. Mizo tawng a ziak lehkhabu te leh mizo chanchin ziakna lehkhabu te kan chhiar uar deuh deuh a tul a ni a ti. Minister chuan sorkar a kan thil ngen leh sorkar atanga kan beisei te sorkar leh ram sum leh pai dinhmun thlir chunga ngenna thlen a pawimawh thu a sawi bawk a ni.

Vawiina building hawn tak hi Sorkar laipui a Ministry of Culture a Raja Rammohan Roy Library Foundation National Mission on Library atang a sakna sum Rs.50 lacs hmuh a ni a, reading room leh conference hall sak niin District Library Building awmsa chunga sak a ni. Tun dinhmunah Kolasib District Library ah hian lehkhabu 24,000 a awm mek a, member naupang 358 leh puitling 1360 an awm mek bawk.

Vawiin building hawnna hun hi Pu R. Hmingthanzuala, Director Art & Culture Department in a kaihruai a ni.