Vawiin Dt.16.12.2019 chawhma dar 11:30 khan Aizawl Tlangnuam Venga Mary Mount School kum 50 tlin Golden Jubillee chu an School Auditorium-ah lawm a ni a, Pu Lalchhandama Ralte, School Education Minister-in khuallian niin a hmanpui.

Minister chuan Mary Mount School-in kum 50 tlinga Golden Jubillee lawmna hmanpui tura sawm a ni chu lawmawm a tih thu leh Golden Jubilee lawmnaa zirlai leh zirtirtute inbuatsaihna thatzia a hmuhin fakawm a tih thu a sawi a, Bethani Sister ten kum 1969-ah Mary Mount School lo dina, ram tana fa duhawm tak tak an hring chu lawmawm a tih thu leh Education siam thatna kawngah theihtawp chhuah zel tur leh an School motto 'Love one another'tih chu vawng nunga fa duhawm tam zawk hring chhuak zel turin duhsakna a hlan a. Ram leh hnam  siam thatna atan zirna(Education)-a thanharh chu thil pawimawh ber a nih avangin kan society-ah zirna hian dinhmun pawimawh a chan a ngai a, zirnain a tum-kawng engkima hmasawn tih chu a taka a lo thlen zel theih nan thiamna leh zo nun mawi -aia upa zah leh tlawmngaihna te vawng nung zel chungin Mary Mount School-a zirtirtute leh zirlaite chu Mizoram tlakbalna tiphuisuitu ni turin a sawm a ni.

Vawiin Mary Mount School Golden Jubilee lawmnaah hian Most Rev Stephen Rotluanga DD, Aizawl Bishop te, Sister Rose Celine  Bethani Sisters Superior General  leh Sister Joy Bethani Sisters Provincial Superior te pawhin thu an sawi.

Mary Mount School hi kum 1969 khan Bethany Educational Society, Mangalore ten dinin bul an tan a, a tirah hian zirlai 30 an awm a, tunah hian zirlai 1700 leh zirtirtu 50 an awm mek a ni.    

Vawiina Golden Jubilee lawmnaah hian Mary Mount School-a lo thawk tawh Father, Brother, Sister, zirtirtu leh zirlai lo lut tawh te, zirlaite leh an nu leh pate mi 3000 chuang an tel a ni.