National Commission for Women member Pi Soso Shaiza chuan vawiin khan Chief Minister Pu Zoramthanga chu a pisa ah hmu in, Mizorama hmeichhe dinhmun chawisanna tura hmalak theihna te an sawi dun.

Pi Soso Shaiza hi National Commission for Women aiawh in Mizoram leh a bik takin aspirational district Mamit chhunga hmeichhiate dinhmun zirchianga lo kal a ni a. Chief Minister hnenah hian Mamit district tihhmasawn tura hmalaknate chu fakawm a tih thu a hrilh a. Hmalak belh zel theihna tura Schools of Excellence din te, working women hostel siam te tha a tih thu sawiin, NWC kaltlanga awareness programme leh research buatsaih a theih thu a sawi bawk a. Ram inrelbawlnaah hmeichhia tel ve chungchang leh police lama hmeichhia tam zawk an luh theih a duh thu a sawi bawk. Chief Minister nen hian handloom chawisan pawimawhna te leh entrepreneurship kaltlanga hmeichhia dinhmun thalo zawka awmte khaikan pawimawhzia te an sawi dun bawk a ni.

Mizoram State Commission for Women Chairperson Pi Lallawmchhungi leh member Prof. Lalneihzovi ten Pi Soso Shaiza hi an tawiawm a ni.