Nimin chawhnu khan Power & Electricity changtu Minister leh Tawi bailtu MLA ni bawk Pu R. Lalzirliana chuan Saitual District mipui ten tangkai taka an hman atan Saitual Bawrhsap Office a Conference Room leh Conference Hall thar te chu a hawng.

Heng remchanna hawn programme Addl DC Pu R Lalnghakliana kaihhruai ah Pu R Lalzirliana chuan Saitual District in a ngaina hria DC a nei chu lawmawm tiin Saitual in District an neih thei nana theihtawp chhuah ani dan te, hma an lo kal dan te leh chanchin kal tawh te sawi a. Kum sawm hnua District puangtu te ngeiin District puan an tihhlawhtlin chu Pathian remruatna ropui nia ngaiin Lal Dorawta'n Kristian hmasa te humhim nana a lo din khua - Saitual nen pawh he thu hi a in hmeh hle a tih thu a sawi.

Minister chuan District tharah vawileh khata thil zawng zawng a neih a harsat thu te leh a tahtawla thil a awm chho thin thu te sawilangin District dang te phak vat mai tur te emaw, an neih ang zawng zawng vawi leh khata neih ve nghal mai emaw, rilru pu lo turin mipui te chah a. District thar chu zawi zawia tih changtluna dawmkawn chho zel ani dawn a, chuvangin mipuiten hemi kawnga rilru zau tak pu a ngaituahna fim tak an hman a pawimawh a, chutiang rilru pu turin mipui te ka duh cheu ni, a ti. Innawrna leh phunnawi te hi hnufualna chikhat nia a ngaih thusawiin thil engkim zau taka sawiho in thil tha a hring chhuak thei, kan tum te pawh a hlawhtling thin zawk a ni, a ti.  

Saitual DC Pu C. Lalpeksanga chuan Bawrhsap Pisa chu bultan chauh anih avangin thawktu lam an tlem a, Conference Room leh Hall te hi mipuiin an hmang tangkai atan kan nei a, a enkawlna lama theihtawp min chhuahpui turin mipui te ka ngen duh cheu ni, a ti.

He programme zawh hian Tawi Constituency Level Sports Committee chu an Chairman Pu R. Lalzirliana hovin Mizoram State Games a Tawi bial in puahchah dan te thlir hovin an thukhawm a, infiammi thlan chungchangte, mamawh hrang hrang te, leh sports discipline 20 an telna tur te chu an sawiho a ni.

Pu R. Lalzirliana hian Saitual DC Circuit House sakna tur hmun chu haw lamah a en nghal bawk a ni.