Vawiin khan Central YMA Hall Tuikhuahtlangah School Education Minister Pu Lalchhandama Ralte chuan  Mizo Academy of Letters (MAL) Annual Meeting a hmanpui a,  Academy Award 2019 dawngtu Pu Lalthangfala Sailo hnenah chawimawina thuziak leh tangkapui a hlan a. ‘Mizo tawng leh Eighth Schedule’ tih lehkhabu MAL buatsaih chu a tlangzarh bawk.   

Pu Lalchhandama Ralte chuan he hunah hian thusawiin Mizo Academy of Letters (MAL) in kum 3 dana Academy Award a hlan thin chu hlu a tih thu a sawi a.  MAL in chawimawi phute an chawimawi thin chu lawmawm a tih thu leh chawimawi phute chawimawi chu hnam ang pawha uar deuh deuh a pawimawh thu a sawi a, Academy Award dawngtu Pu Lalthangfala Sailo chu dawng awm tak a nih thu leh a lawmpui thu a sawi. Thangthar zingah thu leh hla tha tak tak han ziak mai thei an awm nual a, heng mite tan hian MAL-in ban phar sei deuha huikhawm pawimawh a ni a ti a. Tawng thuah hian thangtharte kan tla chhe tial tial a, hawrawp kim lova thuziak te a tam tial tih sawiin Mizo society a tawng lama kan than chhoh zelnaah MAL hian ring rawlh thuk deuh deuh tul a tih thu a sawi bawk. Pu Lalchhandama Ralte chuan thangtharte rilruah hnamzia ze mawi tuh a tul a, nun kawng dika hruai thei tur thu ziak uar turin MAL member te chu a sawm a ni.     

MAL Annual Meeting-a Academy Award dawngtu Pu Lalthangfala Sailo pawhin thu a sawi a. Academy Award chu phu lo nia a inhriat thu leh duhsakna ropui tak nia a hriat thu a sawi. Academy Award dawngtu Pu Lalthangfala Sailo hian Chawimawina dang Sangeet Natak Academy Award 2007 te, Padma Shri Award 2009 te, Bharat Adivasi Drama Award 2012 te, State chhungah Pu Buanga Award 2015 te a lo dawng tawh a ni. MAL Annual Meeting hi Prof Laltluangliana Khiangte-in a kaihruai a. An memberte hmun hrang hrang atangin an kalkhawm a, chawhnu lamah Mizo tawng leh Eighth Schedule tih chu an sawihova, hruaitu thar an thlang bawk.