Mizoram Youth Commission-in ram a mamawh dan sorkarin hriain chak takin hmalak chhoh mek zel a ni a, ni 20.11.2019 khan Dr.Vanlaltanpuia, Chairman MYC leh Pu Lalnunmawia Chuaungo, Chiesf Secretary hovin MINECO chhungah MYC hmunhma tur enfel a ni.

MYC Chairman Dr.Vanlaltanpuia chuan Mizoram Youth Commission-in tun thlengin ram a la nei lo a, hei hi ngaih pawimawh hmasak a tulzia hriain Chief Minister-ah thlen a ni a, a ngaih pawimawh zingah a tel hlauh chu a vanneihthlak takzet a ni a ti. MYC Office hi thalaite inpui a ni a, Zoram thalai lehkhathiam leh thiam lote, zirlai leh hna zawng mek ten office thar an neih thuai theih nan chak taka bawhzui mek a ni a ti bawk. He hunah hian GAD Secretary Pu Ashsish Kundra , PWD Chief Architect Pu George Lalzuia leh official pawimawh dangte an tel bawk a. MYC hian kalphung thar a nei dawn a, chumi atan chuan MYC Policy 2019 pawh peih thawhkhat ni tawhin, Road Map & Action Plan 2019-2020 pawh peihfel a ni tawh a ni.

He MYC Road Map tharah hian Zoram thalaite zawng zawng huapzo hmalakna thar kalpui a ni dawn a. Thalai hna zawng mekten awlsam, zangkhai leh zau zawka hna an zawn theihna turin MYC chuan Naukri.com thawhpuiin ‘MYC Job Portal’ pawh buaipui mek zel a ni. Indian Army Recruitment Rally 2019 neih mekah MYC chuan kum dang zawng aia result tha a neih beisei a ni a, MYC hnuaia train mek tam zawkin physical test an paltlang tawh thu dawn bawk niin, heng physical test paltlangte hi MYC chuan training a pe chhunzawm dawn a, February 2020-a Written Examination atan heng naupangte hi a buatsaih leh bawk dawn a ni.