Vawiin khan Pu K. Lalrinliana, Minister, Food, Civil Supplies & Consumer Affairs, Local Administration Department, Fisheries chuan Mamit Vaisam Park chu khuallian niin a hawng a. Er. H. Lalzirliana, 3- Mamit A/C MLA chuan khualzahawm niin he hun hi a hmanpui bawk.

Local Administration Minister Pu K. Lalrinliana chuan Vaisam Park hawn theih tura peih a ni ta chu duhthusamin la changtlung lo mahsela lawmawm a tih thu a sawi a. Tunlai khawvelah khawsakphung tihrualkhai nan (balance life) leh rilru tihthawven nan hetiang Park hi kan mamawh tawh hle a. Kohhran tan Bethelna hmun atan te, Department hrang hrangte tan pawh intihhlimna hmun atan leh District chhung mipuite tan Picnic-na hmun atan te tangkai taka hman chhoh a nih a beisei thu a sawi.

Er. H. Lalzirliana, MLA Mamit chuan Mamit District tana thil chhinchhiahtlak leh hlu tak mai Vaisam Park hawn a ni ta chu Mizoram Sorkar leh achangtu Minister chungah bial mipui aiawhin lawmthu a sawi a. Vaisam Park luah tan anih phat atang hian a vawnfaina kawngah theihtawpchhuah tlang a, bawlhhlawh paih dan leh sawngbawl danah atir phat atang hian system mumal tak neih nise a duh thu a sawi a. Department Heads hrang hrang vawiina lokal khawmte chu an Department theihna zawn theuhah Vaisam Park changtlunna tura tha thawh turin a sawm bawk a ni.

Pu K. Tlangruala, DLAO Mamit chuan Project Report pein Vaisam Park cheibawlna atan hian Rs 142.00 Lakhs hmuh a ni a. Hemi atang hian Kum 2016-17 a Rs 60 Lakhs hmuh chu Park cheibawl nan veka hmang lovin Vaisam Park chhunga P- Patta lo neite nen insiamrema an ram lei nana hman a ni a. Vaisam Park zau zawng hi a dung 502.00 M leh a vang 130.00 M niin a Area hi 16,965 Sq.M (12.70 Bigha) a ni. Vaisam Park cheibawlna atana sum hman dan chi hrang hrang a tarlang a ni.

Vawiin Vaisam Park hawnna hun hi Pu Rodney L. Ralte, IAS, Secretary LAD chuan a kaihruai a. Pu R.S. Lalzamliana, Director LAD chuan lawmthu a sawi a. District Bawrhsap, khawtlang hruaitute, Department hrang hrang hotute, LAD Officials te bakah thutharthehdarhtute he hunah hian an tel a ni.