Vawiin khan Home Minister Pu Lalchamliana’n a pisa ah Central YMA hruaitute leh Police hotute kawmin Krismas leh Kumthar vuakveta mipuite himna tur leh thlamuang taka hunpui an hman theihna atana hmalak dan tur an sawiho.

He inkawmnaah hian kum kaltaa venhim hna lo thawh tawh dan te thlir letin kuminah pawh Police leh YMA te hmalaknain khauh taka venhim hna thawh leh ni se an ti a. Zu leh ruihhlo man leh khuahkhirh dan tur te, halpuah leh halmawi chi hrang hrang hal lo tura ven leh inzirtir te, naupang silai lem mu nei chi khap tur leh insual leh buaina leh buaina siam te man leh hrem dan tur te kawng hrang hrangin sawi ho a ni a. Thil tha lo hrang hrang lo luhna kawnga check gate ten uluk zawka lo check tur leh a tul anga Police patrol leh YMA duty pawh bultan turin rawtna siam a ni.

Hei bakah khawtlanga tlawmngai pawl duty te tlawh chhuah leh a tul anga tanpuina pek te, Magistrate leh Police duty te chak taka an thawh leh theihna atana ruahmanna siam te tha an ti a. A tulna hmunah temporary beat post siam te pawh tha tiin Police lamin a tul anga an ruahman turin dah a ni.