Mizoram Legislative Assembly, Deputy Speaker Er. Lalrinawma chuan vawiin khan National Institute of Electronics and Information Technology (NIELIT) Aizawl leh Mizoram Science, Technology & Innovation Council(MISTIC) tangkawp te buatsaih Intellectual Property Rights chungchanga ni khat awh Workshop, NIELIT Aizawl Zuangtui campus ah a hmanpui a. Er. Lalsawmliana, Principal Scientific Officer, Directorate of Science and Technology, Mizoram Sawrkar in Deputy Speaker hi a tawiawm a. NIELIT hotuten Deputy Speaker hi an zirna in hmunhma te a fangkual pui bawk a ni. 

Deputy Speaker Er. Lalrinawma chuan India ramin Intellectual Property Rights chungchanga hma a lak dan leh hmasawnna  a neih chhoh dan chanchin te sawiin kan thiamna atanga thilsiam chhuah te hi patent nachang kan hriat a pawimawh a, chutiang bawkin keimahni hnam thil ngei te pawh dan ang thlapa a neitu nihna kan neih a pawimawh a ni a ti a. Hnam thil te GI hnuaia kan vawn that loh chuan midangin min ruksak thei a, a tuartu chu keimahni kan ni thei a ni, a ti. Tunlai khawvel thiamna sang chho zelah a tak tak ang chiaha, thliar hran har, thilsiam a tam tawh a, heng te hi trademark bawhchhiatna a ni a. Khawvel changkanna kal zelah nasa takin Intellectual Property Rights chungchangah thanharhna a thleng mek a, Mizo thalai lehkhathiam te hi helamah hian kan beng te ti vara, kan than harh a pawimawh takzet a ni, a ti bawk. 

Er. Lalrinawma chuan Mizo te hi hma kan sawn zel nan  chapona tel lovin kan in dahsan a, mahni leh mahni kanin ngaihsana, Pathianin ram, tawng leh hnam thil leh nunphung min pek te hi kan mawipui ber ani  tih hi kan hriat a tha a, hengte hi chawinungin kan ngaisang tur a ni, a ti.  Mingo an fing ber an huai ber tih hi kan kalsan a hun tawh a, mi ngo leh hnam dang ngaihsan hi kan paih bo a hun tawh a, Mizo angin Mizo te hi kan mawi ber tih hi kan nunpui a tul hle a ni, a ti bawk. 

Workshop tannaah hian Pu Th. T. Gunendra Nath Singh, Director In-charge, NEILIT Aizawl chuan thuhma sawiin an zirna in chanchin tlangpui a tarlang a. He hunah hian Pu Th. Prameshwor Singh, Executive Director, NIELIT, Imphal leh Pu Th. Surendra Nath Singh, Director, MASTEC, Manipur Sawrkar te pawhin IPR chungchanga thil pawimawh te leh IPR in khawvel a tuam chhoh dan te chu an tarlang a. Program thawhkhatna hi Pu C. Zoremsanga, Scientist 'C' NEILIT, Aizawl in lawmthu sawiin a khar a ni. 

Chawhnu a Technical Session ah Pu Th. Surendra Nath Singh, Director, MASTEC, Manipur Sawrkar leh Dr. Lalruatfela Renthlei, Project Scientist, MISTIC, Mizoram Sawrkar te IPR chungchanga paper an present te chu zirho a ni. 

Workshop in a tum ber chu patents, copyright, industrial design rights, trademarks, plant variety rights, geographical indicators leh hetiang kaihhnawih inhrilhhriatna, hriatzauna leh zirtirna pek a ni. Workshop hi NIT Mizoram, Mizoram University, Polytechnic Lunglei, Women's Polytechnic Aizawl, ICFAI University leh NIELIT zirlai 100 chuangin an chhim a ni. 

NIELIT Aizawl Centre hi kum 2001 khan Centre for Electronic Design & Technology of India tih hming pu a din a ni a. Tunah hian NIELIT Aizawl Centre hnuaiah Extension Centre Lunglei Pukpui-ah leh District hrang hrangah Study Centre engemaw zat an nei mek a. Ram chhung ah NIELIT Centre 41 a awm mek bawk a ni.

Attachment

  • Loading attachment...