Vawiin khan JICA Cooperation Project hnuaia Joint Coordination Committee (JCC) chu a vawi 4 nan Chief Secretary Conference Room, MINECO-ah neih a ni a. He meeting hi Chief Secretary Pu Lalnunmawia Chuaungo-in a kaihruaiin nodal department Irrigation & Water Resources Department bakah a kaihhnawih department dang hotute an tel a. JICA aiawhin Mizorama hna thawk mek JICA Project Team bakah JICA India Office, New Delhi atangin Chief Representative Pu Katsuo Matsumoto hovin mi 3 lo kal te an tel a ni.

Vawiina meeting-ah hian Mizorama Technical Cooperation Project - ‘The Project on Capacity Enhancement for Sustainable Agriculture & Irrigation Development in Mizoram’ kalpui zel dan sawiho a ni a. Project hnuaia guideline leh manual siam te, Mizorama agriculture hmasawnna atana hman a nih theih dan te leh 2nd pilot project atana budget sawiho a ni. Tunah hian he project hnuaia 1st pilot project chu kalpui mek niin, nakum atanga tan tur 2nd pilot project atan inbuatsaihna neih mek a ni. 2nd Pilot Project atan hian Lamchhip, Aibawk RD Block, Tlangsam, Champhai RD Block leh Bilkhawthlir ‘N’, Bilkhawthlir RD Block chu thlan a ni.

Technical Cooperation Project hi Mizoramin ei leh bara a intodelh theih nana JICA-in Master Plan a lo siam tawh tihhlawhlinna tura hmalakna a ni a. He project-in a tum ber chu loneituten agriculture lama eizawnna ngelnghet an neih theih nana Japan thiamna, sorkar hnathawkte leh loneitute hnena hlanchhawn a ni.

He project hi kum 5 (July 2017-June 2022) chhung awh tur a ni a. Mizoram RD block 4 - Bilkhawthlir, Aibawk, Serchhip leh Champhai ah te hmalak mek a ni.