2283/2023-2024

Aizawl the 12th October, 2023 : Vawiin khan  Govt. Ch.Chhunga  High School Golden Jubilee chu Luangmuala an school tualah lawm a ni a, School Education Department Secretary Dr Lalzirmawia Chhangte IAS-in khuallian niin a hmanpui.

Dr Lalzirmawia Chhangte Secretary chuan he Jubilee lawmnaah hian thusawiin zirna pawimawhna leh hlutna a sawi a, zirna hi a zau zawnga sawi chuan  pian hlim ațanga thihni thleng huam a ni a, kan nun pumpui hi zirna a ni a ti a. Zirlaite chu Exam-naa pass tum ngawt lova thiamna tak tak neih tum tur te, an zirlai chu midangte hrilh chhawng thei tur khawpa chik tur te, chhawrtlak leh hmantlak nih tum turin a chah a ni.

Secretary chuan zirtirtute pawh zirtir dan ngai reng hmang lova, tunlai mila inher rem thei turin a chah a, ram changkangten an tih theih ang chu ti ve thei turin a fuih a ni. Hriatna hi thiltihtheihna a ni tih sawiin hriatna chu zirna ațanga neih a ni a,  hriatna leh thiamna  kan neih chu ral ve thei lo, rohlu a tling a ni a ti.

Dr Lalzirmawia Chhangte hian Golden Jubilee hriatrengna lungphun  a hawng a, souvenir a tlangzarh bawk.

Khualzahawm Pu Lalsangliana MCS, Director School Education pawhin thusawiin Ch Chhunga High school chu hmunhma nei tha tak, thawktute țhahnemngaia an chetna hmuh tur awm a ni tih sawiin lawmawm a tih thu a sawi a, zirna sikul enkawl kawngah sorkar kut nghak ngawt lova thawktuten an thawh theih tam tak a awm thu a sawi bawk. Hlawhtlinna hi vawi lehkhata neih mai theih a ni lo tih sawiin zirlaite chu hrehawmna leh harsatna inbawhbehtir lova, chhel taka kal tur te, sorkar, khawtlang leh kohhrana mi pawimawh ni thei tur khawpa inchher puitling turin a fuih bawk. 

School Education Director hian School hall sak thar a hawng nghal bawk.

Pi Rothangi kum 99,  Chief Minister hmasa ber Pu Ch Chhunga nupui chuan Jubilee cake a zai a, thu a sawi bawk a. Hun hmasa lama school-in harsatna a tawh dan te, Ch Chhunga hming dai lova siamtu an nih avanga a lawmthu a sawi a ni.

Govt Ch Chhunga High School  Headmistress Pi Lalrinsangi'n report a pe a,  Ch Chhunga High School hi Feb 14, 1973 khan Ropaiabawkah mi țhahnemngaiten an din a, 1975-ah tuna a dinna Luangmualah hian sawn a ni a, 1991 ah sorkar sikulah hlankai a ni.  He sikul ațang hian mi 1229-in HSLC an pass tawh a, kum 1996 ah HSLC exam centre a ni a, school 12 vel kumtin an exam țhin a ni. Kum 2022-ah Samagra Shiksha ațangin Higher Secondary school ah hlankai a ni a, tunah hian thawktu High school leh Higher secondary school-ah hian  21 an awm a, zirlai 108 an awm mek a ni.

Govt. Ch Chhunga High School Golden Jubilee lawmnaah hian School Education Department Officer țhenkhatte, MBSE Controller te, Pu Ch Chhunga nupui leh a tu leh fate, he sikula thawk tawh leh zir chhuak te, tuna thawk mekte leh zirlaite an tel hlawm a ni.