304/2023-2024

Aizawl, the 3rd May, 2023: Rise and Shine, Samagra Shiksha leh Education Department buatsaih Mizoram pum huap Science Hackathon chu vawiin khan ATI Auditorium, Aizawl ah kharna hun leh lawmman semna hun buatsaih a ni a. Power Minister Pu R.Lalzirliana chu khuallian a ni.

Pu R.Lalzirliana chuan khawtlang nun hmasawnna atana pawimawh bulpui chu zirna a ni a, ram leh hnam hmasawnna turin field hrang hrangah mithiam bik kan neih a ngai a, chutiang mithiam chher chhuak tur chuan education kan mamawh a ni, a ti. Mihring nunah zirna hian tawp ni a nei lo a, zirna tluang pangngai piah lamah co curricular activities, heng hackathon ang chi te a pawimawh a, hlawhtling taka Mizoram chhunga zirlai te tana Science Hackathon buatsaih a ni chu lawmawm a tih thu Minister chuan a sawi a. Thil thar hriatbelhna bakah mipui hmaa din theihna remchang siamsakin zirlaite mahni inrintawkna nasa lehzualin a pe dawn a ni, a ti. Zirlai naupangten environment humhalhna lam leh pipute lo neih dan bansana tunlai lo neih dan tha zawk kalpui a tulzia an sawite chu Minister chuan ngai pawimawhin, vei chhunzawm zel turin zirlaite a fuih a. Mizoramah chuan lo vah leh hal kan la kalpui reng avangin kan ramngaw te a chereu zel a, a thlakna tur lo neih dan tha zawk ngaihtuah a ngai a, chutiang ngaihtuahna chang leh veina chang zirlai naupang ten an hria chu lawmawm a tih thu Pu R.Lalzirliana chuan a sawi a ni.

Tun tum Science Hackathon hi Class 6 atanga Class 10 zirlai te tana buatsaih a ni a. Round thumah then niin Quiz round, live challenge leh final meet up neih a ni a. Zirlai titha zual sawm thlang chhuakin vawiin khan ATI Auditorium ah mipui hmaa project sawifiahna (presentation) hun an hmang a. An zing atang hian Government Mizo High School zirlai Lira Lalrinsangi, Class 9 chu titha berah thlan niin cheng 10,000 a dawng a. Pahnihna chu Govt Chhinga Veng Middle School zirlai Lalrinzuali, Class 8 aniin cheng 7000 a dawng a. Pathumna - Govt Mizo High School zirlai Lalhmangaihzuala, Class 10 chuan cheng 5000 a dawng a ni.

Rise and Shine hmalakna Science Hackathon hi zirlai ten lehkhabu atang chauh ni lo, a taka science thiamna an neih theih nana ruahmanna siam a ni a. Mizoramah hian Rise and Shine Programme hi Bhoomi Educational Consultancy ten an duang a ni.