305/2023-2024

Champhai, the 3rd May, 2023: Vawiin chawhnu dar 2 khan School naupangte'n hriselna tha an neih theih nana hmalaknate ngaihtuahin District Level Coordination Committee on Ayushman Bharat under School Health and Wellness Programme, Champhai District chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

He hunah hian School Health and Wellness session report, School Health and Wellness reporting system, Weekly Iron Folic Acid Supplementation (WIFS) semchhuah leh report dan te, Reporting channel leh Line Department-te mawhphurhna sawiho a ni.

District Bawrhsap Pu James Lalrinchhana chuan Zirlaite chu taksa leh rilru lama thanglai an nih avanga enkawlna bik pek an mamawh thu sawiin, Ayushman Bharat School Health and Wellness Programme hnuaia zirtirna kalpui dan tur module 11 duante chu tha taka hlenchhuah a ngai a ni, a ti a. Thawhhona tha leh inhriatpawhtawnna kaltlangin program hlawhtling taka kalpui theih a ni tih hriaa theihtawp chhuah theuh turin member-te a sawm a ni.

CMO Champhai Dr. PC Lalhmingliana chuan Ayushman Bharat School Health & Wellness Programme chu kum 2020 atanga kalpui tan a nih thu a sawi a. Hriselna kawnga hmalaknate Department mal chauh ni lo, Line Department leh khawtlang nena tangruala kalpui a tul thu a sawi bawk.

He hunah hian Ministry of Health & Family Welfare leh Ministry of Human Resources Development tangkawp buatsaih Pre-primary atanga Higher Secondary School zirlaite taksa leh rilru hriselna kawnga hmalakna, Ayushman Bharat School Health and Wellness Programme chungchang Pi K.Lalengliani, Rashtriya Kishor Swasthya Karyakram (RKSK) Co-ordinator, National Health Mission (NHM) hnen atangin ngaihthlak a ni.

School Health & Wellness Programme (Ayushman Bharat) Scheme hnuaiah hian Champhai District-ah Master Trainer 3 awm mekin, a bultan nan CMO Champhai huamchhunga Middle School, High School leh Higher Secondary School 141 a zirtirtu 268 te Health & Wellness Ambassador tura training pek niin, training material-te pek fel an ni a, class tinah anmahni thlawptu tur Health & Wellness Messenger 2, mipa leh hmeichhia pakhat ve ve an ruat leh a ni. Ambassador-te hi module 11 ahte zirtirna pek niin, hengte hi zirlai curriculum-a telh tura beisei niin, kar khatah class vawi hnih tal nei thei tura beisei an ni.

Thukhawm chuan Ayushman Bharat School Health and Wellness Programme hnuaia Module behchhana zirtirna pe thin Health and Wellness Ambassador-te chu thla thar ni 10 ral hma ngeia format mila report-na hmun tura ruatah report siama thehlut zel thin tura chah an ni a. Kum 10-19 inkarte'n Anaemia an vei loh nana Weekly Iron Folic Acid Supplementation (WIFS) pek dan turte leh, rulhut hlo albendazole thla ruk dan zela semchhuah leh report felfai taka pek dan turte sawiho a ni bawk a. Undivided Champhai District WIFS target neih dante ngaihthlak a ni a; a tul anga zirchian ni se tih a ni a. School Health and Wellness Programme-te changtlung leh awlsam zawka kalpui a nih theih nan Undivided Champhai District huam chinaahte Nodal Officer 3 ruat an ni bawk.