306/2023-2024

Lunglei the 3rd May, 2023 – Lunglei High Powered Committee buatsaihin vawiin khan HPC Conference Hall-ah tun hnaia Lunglei District in hnathawh that avanga India ram pum huapa chawimawina dawn pathum - Subhash Chandra Bose Aapda Prabandhan Puraskar 2023, Best Police Station of Mizoram 2022, leh National Water Warrior dawng te lawmpuina hun hman a ni a. Citation leh pawisa fai lawmpuina hlan an ni.

He hunah hian Lunglei DC Pi Ramdinliani, IAS, Pu H. Ramthlengliana, IPS, DIG (Southern Range), sawrkar official dangte, Lunglei HPC member-te, Lunglei MJA hruaitute leh sawm bik dangte an tel a ni.

Lunglei HPC Vice Chairman Pu Lawmawma Tochhawng chuan Lunglei District atanga ram pum huap chawimawina dawng thei mi engemawzat kan nei chu a lawmawm takzet a ni tiin Award dawngtute thawhrimna leh inpekna avangin lawmthu a sawi a. Heng kan award dawnte hian Lunglei ah theihna tam tak a awm tih a ti lang chiang hle a ni tiin Lunglei HPC Vice Chairman chuan kan hnathawh te leh khawtlang hmasawnna tura kan beihna te kan in hriatpuia kan in fuih phur tlan thin a tul takzet a ni, a ti bawk.

Pu Lawmawma Tochhawng chuan chuan Lunglei Fire Station-in chawimawina an dawn chungchangah phut let nei hauh lo leh chawimawi phut hauh lova Lunglei khawpui kang mai thei, mahni nunna chan huam pawh a an venghim thei chu ropui a tih thu a sawi a, midang te tana inpekna nen lo chuan hetiang thil hi tih theihloh a ni tiin chhuanawm a tih thu a sawi.

Lunglei Police Station pawhin Ministry of Home Affairs, Government of India ina Annual Ranking of Police Stations 2022 a neihah ‘Best Police Station of Mizoram 2022’ an dawng thei te chuan an inpekna ropui zia a lan tir a ni tiin case a awma rang taka an chingfel thin te leh, vantlang nen a thawhho an thiam te chu ropui a tih thu a sawi.

Sairep VC ten tuihna humhalhna tur atana nasa taka hma an lo la thin te leh an hmalakna in India Sorkar beng a thleng hial te chu ropui a tih thu sawiin sum an dawn an hmang tangkai tihna a ni bawk a, hetiang ang hi midang pawhin chhunzawm zel thei se a duh tih a sawi bawk.

Vawiin a chawimawi te hi

1) Ministry of Home Affairs, Government of India Annual Ranking of Police Station 2022 neihah Best Police Station of Mizoram 2022 atana thlanchhuah Lunglei Police Station - Pu LP Zohmangaiha, Officer In Charge, Lunglei Police Station hnenah hlan a ni.

2) Kangmei ven kawnga hnathawk tha Lunglei Fire Station in Subash Chandra Bose Aapda Prabandhan Puraskar 2023 Award a dawn – Pu T. Lalchhandama, Station Officer, Fire & Emergency Services (F&ES) Lunglei hnenah hlan a ni.

3) India rama hmeichhia te zinga faina, tuihna humhalh leh water supply system enkawlnaa  thawktha te chawimawina Water Warrior Award dawngtu Pi HS. Lalawmpuii, Sairep VCP, Lunglei District te an ni.