Vawiin khan Vanapa Hall-ah SCERT chuan Science leh Mathematics subject a zirlai ti thate hnena lawmman semna programme ‘34th Cash Award for Proficiency in Science & Mathematics 2010-2011’ an buatsaih. He lawmman semna hun hi Education Minister Pu Lalsawta’n a hmanpui a, SCERT Director Pi Malsawmthangi’n kaihruai a,  Jt Director Pi Sangthanmawiin lawmman sem tan chhoh dan chanchin report pe in a sawi.

Pu Lalsawta chuan zirna khawvela Science leh Mathematics thiam a pawimawh thu sawiin zirlai ten heng subject pahnih te an thiam zual nan leh an tui chhoh zel nan hetiang chawimawina hun hi buatsaih anih thin thu a sawi a. Science leh Mathematics zirna tih hmasawnna tura SCERT Jt. Director lo ni tawh Pu A Sawihlira thawhrimna leh inpekna chu ropui tiin hemi kawnga zirtirtu te, pawl leh mimal thahnemngai te hmalakna chu lawmawm a ti.

Minister chuan tunlai khawvel nun  ah min tihlimtu leh awlsamna min siamsaktu tam tak a awm thu sawiin  tangkai taka hman a nih theih rualin, tih luat bik a nih chuan zirlai nun a nghawng theih thu a sawi a. Tunlai Naupang leh thangthar ten an mahni zirlai bu nilo lehkhabu dangte chhiar nachang leh Library hlutna an hre loh chu pawi tiin lehkhabu chhiar duhna (reading habit) tuh a tul thu a sawi.   

Cash Award hi Primary (Mizo & English), Middle School (Mizo & English), HSLC, HSSLC Exam; Pawl VIII, IX leh XI Promotion Exam Result atanga Science leh Mathematics subject a titha zual bik zirlai 240 te hnenah Minister hian a hlan a. Hemi bakah hian National Talent Search Examination-a State Level Exam a ti tha pathum te hnenah lawmman pek a ni bawk.

He Award hi School Education Department chuan Science leh Mathematics subject-a tuina leh inelna thianghlim a awm theih nan kum 1978 atanga khan a pe tan a, zirlai 5456 te hnenah pek a lo ni tawh a ni.