No.6327/2020-2021

Vawiin Dt.22.10.2020 (Ningani) hian Science, Technology & Innovation Policy (STIP) 2020 duan kawnga inrawnkhawmna video conference kaltlangin ram pum huapa neih a ni a, Mizoram atangin Information & Public Relations Minister leh Rural Development Minister ni bawk Pu Lalruatkima a tel a, he inrawnkhawmna neih-ah hian State 26 leh UT 4 atangin Chief Minister, Deputy Minister leh Minister hrang hrang te an tel a. Online Video Conference hi Science & Technology Department Conference Hall, MINECO-ah neih a ni.

Union Minister Science & Technology, Earth Sciences Shri Dr. Harsh Vardhan chuan he hun hi a kaihruai a. Union Minister Shri Dr. Harsh Vardhan chuan Science, Technology leh Innovation lama Policy mumal tak neih a pawimawhzia sawiin Policy tha nei tura inrawnkhawmna pawh tum 300 chuang neih a nih tawh thu te, hripui kan tawrh meka ram chhung mamawh phuhruk kawnga Innovation pawimawhzia te leh helam kawnga State hrang hrangte thiltih mek inhriat pawh tawn pawimawhna te a sawi a ni.

He inrawnkhawmnaah hian Mizoram aiawha tel Minister Pu Lalruatkima pawhin thu sawiin Mizoram chhunga ramhmul hausakna kan neih te hei aia hmang tangkai lehzual tura tan lak pawimawhna te, tualchher thiam (local innovator) ten awlsam zawka an thilsiam chhuah an tihral zung zung theihna tura market channel tha zawk siam pawimawhna te, ram chhunga technology awm tawh sa awlsam zawka inhlan/inlei chhawn theihna tur Platform siam te, State hrang hranga Science & Technology council awmte chak zawka hma an lak theihna tur thuam chak pawimawhna te a sawi bawk a. Minister Pu Lalruatkima chuan Mizoram chu biodiversity hot spot a nih thu sawiin, kum 2017 a din, ‘Mizoram Bio-resources Centre’ tihchangtlung nana sawrkar laipui atanga funding pek chhuah thuai a nih theih nan Union Minister chu hmalak pui turin a ngen a ni.

STIP-2020 Head, Shri Dr Akhilesh Gupta chuan he hun hi sawihawnna a nei a, Planning Department Commissioner & Secretary Dr. Vanlalramsanga leh Chief Scientific Officer & Member Secretary, Directorate of Science & Technology Dr. R.K. Lallianthanga leh midangten an tawiawm a ni.

STIP Policy 2020 duan kawngah hian Central sawrkar hian Inrawnkhawmna hi thuang li(4)-a kalpui niin a Pakhatnaah mipui nawlpui leh mithiam bik te ngaihdan awmze neia lakkhawm a ni a, a Pahnihnaah hian thupui thlan bikah mithiam bikte nena uluk taka inrawn khawmna neih a ni leh a, a Pathumnaah vawiina kan neih tak State sawrkar hruaitute ngaihdan lakkhawm a ni leh a, a Palinaah Science & Technology Stakeholders te nena inrawnkhawmna neih a ni leh bawk ang.