Mizoram sawrkara Directorate of Science and Technology leh Mizoram Science Society tangkawp buatsaihin vawiin khan Aijal Club-ah hmasawnna tluantling nei tura science and technology pawimawhna chungchang workshop neih a ni a. Finance Minister Pu Lalsawta chu khuallian a ni.
Pu Lalsawta chuan workshop thupui chu Mizoram tana chona nasa tak nia a hriat thu sawiin mi thiam rual kalkhawmten ram hmasawnna tur ngaihtuahna thar nei a, a taka hman tangkai theih tur rawtna siam turin a fuih a. Mizoram kalphungah her danglam leh thlakthleng ngai thil tam tak a awm a, ngaihdan thar leh tihdan thar lakluh a tul tiin ram tana tha zawk tur a nih chuan mipui pawhin tihdan hlui paiha thil thar inthlak pawm thiam turin a chah. Ram hmasawn turin thiamna a pawimawh a, Mizoramah chuan ram leilung hausakna haichhuah tur kan neih tlem avangin mihring thiamna, hriatna leh finna tihpun, human resource hi kan rohlu ber a ni tiin Minister chuan science, technology leh engineering lama mi thiamten Mizoram hmasawnna ngaihtuaha workshop an buatsaih chu lawmawm a tih thu a sawi a ni.
Workshop hi Chief Scientific Officer Dr.R.K.Lallianthanga’n a kaihruai a. Mizoram Science Society President Dr.Tawnenga, Pachhunga University College Principal ni bawk chuan science leh technology hmanga Mizoram tihhmasawn theih dan tur kawng hrang hrang sawi hawnna a nei a.Mizoram Pollution Control Board Member Secretary Pu C.Lalduhawma kaihhruaiin hriselna, thianghlimna leh bawlhhlawh sawngbawl dan Health, Sanitation and Waste Management tih thupui hmangin sawihona hun hman a ni. Agriculture Joint Director (Technical) Dr.Saithantluanga kaihhruaiin ‘Ei leh bar tharchhuah leh a kaihhnawih - Agriculture & Allied Sector’ sawiho a nih bakah Pu C.Lalhmachhuana ITS kaihhruaiin ‘Inkalpawhna chungchang - Transportation Engineering’ sawiho a ni bawk.
Workshop-ah hian PHE, PWD, Health, Agriculture, Horticulture, Geology & Mineral Resources, Aizawl Municipal Corporation, SIPMIU, Mizoram Pollution Control Board, Mizoram Science Technology and Innovation Council, Mizoram Remote Sensing Application Centre bakah zirna in hrang hrang Mizoram University, National Institute of Technology, Pachhunga University College, College of Venterinary Sciences & Animahl Husbandary, RIPANS, Govt.Zirtiri Residential Science College, State Agricultural Management & Extention Training Institute bakah private company leh mimal sawm bikte an tel a ni.
