No.164/2021-2022

Dated Kolasib 16th April 2021: Vawiin chawhma khan Dr.R.Lalthangliana, Health and Family Welfare Department Minister chuan Vairengte screening point a tlawh a, screening point-a thawktute hman turin hmanrua engemaw zah hlanin a hmunhma thawmthatna tur pawisa fai, President, Jt. YMA Vairengte hnenah a hlan nghal bawk a ni. Kolasib District Level Task Force leh Kolasib district-a Health & Family Welfare Department a thawktute nen thutkhawmna hun a hmang nghal.

Health Minister Dr.R.Lalthangliana chuan Vairengte Screening point-a tlawhnaah thawktute leh Vairengte khawtlang hruaitute kawmin, Vairengte chu Covid-19 hri dona kawnga hmatawngtu pawimawh tak a nih rualin ramri ven kawnga khawtlang anga an hmakalnate chu entawntlak a tih thu a sawi a. Covid-19 hrileng thawhhnihna lo thleng mek dona kawngah pawh tha thlah lova sawrkar hmalakna tichaktu ni chhunzawm zel turin Vairengte NGO hruaitute chu a chah a ni.

Health Minister chuan Vairengte Screening point chu ram pawn atanga mihring leh bungrua luhkapui ber a nih avangin endikna chu uluk leh ngawrh taka kalpui a tul thu a sawi a, “Screening Point-a test ti lo lirthei engmahin Mizoram an lut thei lovang,” a ti a, thawktu indaih lohna avanga lirthei tlan tlang palh a awm loh nan a tul a nih chuan Police duty dah belh a nih tur thu a sawi bawk a ni.

Dr.R.Lalthangliana chuan Vairengteah Doctor dah belh a nih dawn thu leh a awm tur pawh tihfel a nih tawh thu a sawi a, Screening point-a thawk tur pawh dah belh tura ruahmanna siam a nih tur thu a sawi bawk a ni.

DC Conference Hall, Kolasiba District Level Task Force-te nen thutkhawmna hun neihah hian Health Minister chuan Kolasiba sawrkara mawhphurtute, tlawmngai pawl leh khawtlang mipuiten thawhhona tha tak an nei thin chu lawmawm a tih thu a sawi a, district dang a buaipui ngai ve lo thil tam tak a awm chungin, tha taka mawhphurna hrang hrang hlenchhuah a ni thin chu fakawm a tih thu a sawi. Dr.R.Lalthangliana chuan hri do nan chuan ramri kan a lo lutte endik a pawimawhzia sawiin Vairengteah pawh, hmaih palh leh chhuah palh awm lovin, lirthei leh mihring lo lut tur te chu kim taka endik hna kalpui a nih tur thu a sawi a. Hri dona kawngah hian Sawrkar department hrang hrang karah thawh hona tha neih a tul thu leh hmalakna chak zawka kalpui tur chuan kalphung pangai pela hmalak a ngaih chang pawhin inhriatthiamna nena indawrtawn a pawimawh thu a sawi bawk a ni. Minister chuan District Hospital, Kolasiba Dialysis khawl bun tum meka neih hmasak ngai, RO Plant chu Kolasib bialtu MLA Pu K.Lalrinliana hmalaknain tih hlawhtlin a nih tur thu a sawi a, World Bank hnuaia hmalakna tur, Mizoram Health System Strengthening Project dilna a hlawhtlin thu leh hemi kaltlang hian Mizoram Healthcare system chuan bung thar a kai ngei a beisei thu a sawi bawk a ni.

DC Conference Hall, Kolasiba thutkhawmna hi Dr.H.Lalthlangliana, Deputy Commissioner-in kaihruaiin Covid-19 dona sawt zawka kalpui a nih theih nan Kolasib district chu Zone 13-a then a nih dan te leh Zonal Executive Magistrate-te hnuaia enkawl a nih dan te a tarlang a. Pu R.Lalramnghaka, IAS, Special Secretary, H&FW Department chuan Covid-19 laka invenna tur Sawrkar SOP chungchang sawifiahna hun neiin Dr Pachuau Lalmalsawma, SNO, IDPS pawhin Vaccine lak thatna leh la tur dik tak ten a hun taka an lak theih nan ngai pawimawh tura inzirtirna uar zawka neih a tul thu sawina hun a hmang bawk a ni.

Dr.Eric Zomawia, Mission Director, NHM chuan vaccine kalpui dan tlangpui sawi zauna neiin Vaccine 1,32,996 pek chhuah a nih tawh thu leh heng zinga 1,01,996 te chu dose khatna niin dose hnihna la mi 31,000 an awm tawh thu a sawi a. Ni 15 April 2021 chu nikhata vaccine pek chhuah tam ni ber niin mi 12,438 hnenah vaccine pek an nih thu a tarlang bawk a ni. Vawiin thutkhawmah hian Medical Officer, Bairabi leh Zawlnuamte pawhin ramria endik hna an kalpui dan report an pe a, Bairabi screening point-ah hian ni 12 September 2020 atanga vawiin thleng khan mi 14,224 endik an nih tawh thu leh Kanhmunah mi 14,388 endik an nih thu an tarlang ve bawk a ni. Bairabi leh Kanhmun screening point-te a tul anga thawmthat a nih theih nan Health Minister hian pawisa leh an mamawh ang bungrua, Computer set, Water Cooler, Refrigerator, Almirah leh a dangte a pe nghal bawk a ni.

Health and Family Welfare Minister hi Pu R.Lalramnghaka, IAS, Special Secretary, Dr.H.Lalchungnunga, Director, DHS, Dr.Eric Zomawia, Mission Director, NHM leh Dr Pachuau Lalmalsawma, SNO, IDPS ten an tawiawm a ni.