No.1065/2020-2020

Vawiin khan Horticulture Department, Mamit Sub - Division hnuaiah thlaichi chi hrang hrang Pu Lalrosanga Khiangte SDHO, Mamit kaihhruaina-in sem a ni.

Pu Lalrosanga Khiangte SDHO chuan thlai thar chhuah kawngah mipui kan intodelh theihna turin Mizoram Sorkar chuan Horticulture Department kaltlangin theihtawp a chhuah reng thu a sawi a. Thlaichi semchhuah chuan thlaichingtute mamawh engemaw chen a phuhruk ngei a beisei thu a sawi. Thlaichi hi Mamit khua leh a chhehvel Bawngva, Nalzawl, Sabual, Dampui, Vawngawnzo, Damdiai, Suarhliap, Phaizau, bakah West Phaileng Circle, Rawpuichhip Horticulture Sub-Division huam chhungah sem mek a ni a. Thlaichi mamawhte tan hian Hoticulture Sub- Division Office, Mamit-ah Office hun chhunga lak theih reng a nih thu a sawi bawk.

Thlaichi chi hrang hrang hi Tuidam Division hnuaia khaw hrang hrangte tan semchhuah mek a nih thu tarlan a ni bawk.

Tunlai khawvela hripui leng mek Covid - 19 avanga harsatna nasa zawk thleng thei anih avang leh mipuite thlaithar chhuah lama kan intodelh theihna turin Horticulture Sub - Division, Mamit hnuaiah thlaichi sem thawhkhatna Ni 21.4.2020 khan thlaichi chi hrang hrang semchhuah a lo ni tawh a ni. Thlaichi la te'n Facemask bakah Social Distancing an ngaipawimawh chu a lawmawm hle a, chutihrualin office dawr leh turte pawhin hei hi ngaipawimawh zel tura ngen an ni bawk.

Vawiinah hian thlaichi French Bean 40 kg, Cow pie Giant ( Behlawi) 20 kg, Hmarcha 4kg , Changkha 18 kg, Bawkbawn 20 kg, Um Ei 5kg, Bawrhsaibe 30 kg, Cucumber 5 kg leh Dhania 10 kg te semchhuah a ni.