1499/2023-2024

Ningani kal ta (10.08.2023) khan Chief Secretary, Dr. Renu Sharma, Chairman, State Executive Committee (SEC) ni bawk hovin tûn hnaia ruah sur nasa avânga Mizoram hmun hrang hranga harsatna leh, chhiatna thleng te thlir hova a ṭul anga siamṭhat hna thawh dan turte ngaihtuah ho turin Emergency meeting neih a ni a. He meeting-ah hian Mizoram Director General of Police thar Pu Anil Shukla pawh telin, Department hrang hranga official pawimawhte an tel a ni. DDMA, Aizawl bak District dang zawng zawng DDMA-te pawhin video conference hmanga meeting hi rawn zawmin an District dinhmun an report hlawm bawk a ni.

Meeting-ah chuan Vaivakawn – Zohnuai leimin-in NH-06 a block dan leh harsatna lian zawk a thlen loh nan PWD leh Traffic lam thuneitu rim taka thawkin motor lian tiamin rei tak dan an nih loh nan hma an lak thu ngaihtlak a ni a. Leimin hian vengchhung inkalpawhna a nghawng lutuk tur phuhruk nan Two-Wheeler tlan theihna tur leite dawh a ni bawk. Leiminin a hnawl Vaivakawn – Zohnuai kawngpui chu siamthat mai theih tur a nih loh avangin PWD lamin ‘Bailey Bridge’ dawh tura an ruahman mek thu te ngaihthlak a ni a, a tul anga lo enzui zel turin a kaihhnawih department te hi hrilh an ni. 

Tin, Khawthlangtuipui lianin Tlabung RD Block huamchhung a tihbuai dan leh, chhawmdawl hna thawh dan ngaihthlak a ni a. Khawmawi khua te, Tleu khuaa tuilian leh quarry chim vanga harsatna thleng te leh district hrang hranga ruahsur vanga chhiatna thlengte District hotute hnen atangin ngaihthlak a ni bawk. 

District tin thuneitute chu hetianga khuarel chhiatna lo thlengah a theih ang anga chhawmdawl hna thawk a, ruahsur nasa tak lo thleng leh thei mekah pawh mahni district ṭheuhte uluk taka lo vil turin Chief Secretary chuan a chah a ni. 

Vaivakawn-Zohnuai, Aizawl-a leimin nasa tak te, Lunglei khawpuia Tourist Lodge panna kawng leh Lawngtlai Electric Veng lei tlahniam te NDMA lama thlen dan turte pawh ngaihtuah nghal a ni. 

DGP pawhin 15th August, 2023, Independence Day lo thleng tur leh State-in Election kan hmachhawn turah D.C. leh S.P te chu ṭha taka mahni district lo vil turin a chah a. 

Secretary, DM&R Department pawhin thu sawiin, DM&R Minister-in SDRF aṭanga chhawmdawlna/ ṭanpuina pêk theih ang angte chu heng chhiatna lo thleng tuartute hnenah hian an mamawh lai taka pek an nih ngei hi a ngaih pawimawh thu a a sawi a. DDMA te chu chhawmdawlna atana sum mamawhte pek zel an nih thu leh, chhawmdawl ngaite chhawmdawl kawnga muangchâng lova, a rang thei ang bera tanpuina an hmuh theih tur ang angte sem thuai zel turin a chah a ni.