Vawiin khan Saikuti Hall, Lunglei-ah security mi MRP leh 2nd Bn. MAP te tan Addl. SP Pu Lalrinawma kaihhruaina hnuaiah Election Training neih a ni a, he hunah hian Lunglei DC Pu V.Sapchhunga chu Khuallian a ni.

Training hawnna-ah Lunglei DC Pu V.Sapchhunga chuan kumin inthlanna chu kumdang zawng aiin Election Commission-in a duh tuiin a duh uluk thu leh September thla chhunga election kaihhnawih training zawng zawng tih zawh vek tur a nih thu a sawi a. Kumdangah Lunglei District-ah Sector Officer/Magistrate 4 chauh nei thin chu kumin inthlanna atan 22 lai nei a ngai dawn a ni, a ti a. Election duty-a kal civil leh security mite zawng zawng inkarah thawhhona tha awm a pawimawh thu te, Mizoram chu state ralmuang tak ni mahse Election Commission thupek zulzuia kal a tul thu te sawiin Lunglei DC chuan fimkhur leh rinawm taka kan thawh theuh chuan Lunglei District timawitu leh tihmingthatu kan ni thei a ni, a ti bawk.

Vawiina security personnel training neihah hian Lunglei SDPO Lalthangpuii Pulamte, Hnahthial SDPO Francis Lalawmkima, Tlabung SDPO B.Laldingngheta leh Lunglei SDO Lalzuiliana ten inthlanna neih chhunga an mawhphurhna leh dan leh thupek kenkawh kawnga an tih tur hrang hrang hrilhfiahna hun an hmang a ni.