Socio-Economic Development Policy (SEDP) hnuaia Board hrang hrang 14 te office, Secretariat Building Annex-II, Treasury Square a buatsaih chu vawiin khan Chief Minister Pu Zoramthanga chuan a hawng. Heng office thar hawnna inkhawm, Assembly House Annex Conference Hall a buatsaihah hian Dy. Chief Minister Pu Tawnluia, Health & Family Welfare Minister Dr. R. Lalthangliana, Dy. Speaker Er. Lalrinawma, Law & Judicial Minister Pu. T.J. Lalnuntluanga, Sports Minister Pu Robert Romawia Royte leh Board Vice Chairman te an tel a ni.

Chief Minister chuan Mizoram chu hmasawnna kawng hrang hrang - ei leh barah te, mipui nunphungah leh hmasawnna policy kalphungah te India hmarchhaka hmahruaitu a dah chu sawrkarin a tum thu a sawi a. Chumi atan chuan SEDP chu siamin, policy tipuitling tura hma la turin Board 14 te chu din an nih thu a sawi. SEDP chuan a huam zau thu leh khawilai bik emaw tan chauh nilova mitin tan a nih thu a sawi a. Chief Minister chuan he sawrkar hmalakna pui ber hi economic sector zawng zawngah leh social sector zawng zawngah hmasawnna pui thlen theihna tura buatsaih a nih thu sawiin, social sector-ah chuan Healthcare in bul tan a nih thu a sawi a. Healthcare Scheme hnuaiah chhung tin tan cheng nuai hnih hnuailamah chuan damlo inenkawlna tum sak an nih tawh thu a sawi. Chief Minister chuan sector dang dangah leh administrative sector ah te pawh ruahmanna siam niin hmalak chhoh zel a nih tur thu a sawi.

Chief Minister chuan SEDP chu pawisa bituk zat nei a sem den den lam a niloh thu a sawi a. Board kaltlangin Sawrkar laipui sum tam tak awm hmang tangkai tura ruahmanna, hmasawnna tur hnathawh theih hrang hrangte project ah siamin hmalak zel tur a nih thu a sawi. SEDP inkhaihruaina milin sawrkarin hma la in policy a siam a, chu policy theuh kalpuina tura Minister Chairman na hnuaiah Vice-Chairman leh board member te awmin an vaiin an thawkho dawn a ni, a ti a. Board member te chuan a taka hnathawh leh enzui, monitoring pawh an thawh zui tur thu a sawi a. Board hrang hrangte hi awlsam thei ang bera din in, hlawh pek leh thawktu rawih chungchangahte pawh a inrenchem zawng zela ruahmanna siam a nih thu a sawi a. Chutihrual chuan Board te chuan thawh tur an neih tam hle thu sawiin, member leh mawhphurtuten an zawn theuhva hnathawh te theihtawp chhuah a an thawh a beisei thu a sawi bawk a. Tlin taka hna an thawh theih nan mamawh belhna a awm a nih chuan board dang din te, member thar lak te pawh a tul ang zela kalpui a la nih tur thu a sawi bawk.

Health & Family Welfare Board Vice-Chairman Dr. Z.R. Thiamsanga chuan board zawng zawng aiawhin thu a sawi a. Ram leh hnam hmasawn theihna tura SEDP hnuaia board pawimawh tak tak dinchhuah a nih thu sawiin, Board din hlawhtlin theihna tura sawrkara hmalatu hrang hrangte chungah lawmthu a sawi a. Board hmalak zelna tura officialte leh mipui tawiawmna a pawimawh tur thu sawiin, SEDP hmalakna zingah Health Care-ah phei chuan thui tak hmalak a lo nih tawh thu te, tangkai taka hman chhor zel a nih tur thu a sawi. Dr. Z.R. Thiamsanga chuan board tin ten theihtawp chhuah a ram hmasawnna tura an thawh tur leh, hmalakna te a hlawhtlin theih nan Zoram mipuite thlawpui a sawm tel a ni.

Office thar hawnna inkhawm hi Secretary Pu Lalhmingthanga chuan kaihruaiin, Planning & Programme Implementation Department Commissioner Pi Esther Lalruatkimi chuan lawmthu sawiin hun a khar a ni. He inkhawmah hian AMC Councillor-te, MZU VC, board member-te, sawrkar hnathawk te leh sawmbik dangte an tel a ni.