Sekhum khuain State Level NLUP hnuaia khaw titha ber (Best Performing Village) nihna an dawn chu vawiin khan khaw nawtin Bazar Shed kawt tualah lawmna an nei a. Hei hi Chief Minister Pu Lal Thanhawla’n a hmanpui.

Chief Minister chuan Sekhum khaw mipuite chu Pathian tihna neia lungrual taka thawhhona tha an nei chu sorkar pawhin a hriatpui a, kut hnathawk tha ber khua an ni chu an lawmpuiawm takzet a ni a ti. Chief Minister chuan an khaw mamawh ber ni-a an sawi tuitlan tur tha chu Integrated Water Supply Scheme hmanga siamsak an ni ang a ti a, bawhzui tur hian department lama thawkte tirh nghal an nih tur thu a sawi a. Hriselna lam pawh an khuain an mamawh tih hriain Chief Minister chuan Health Sub-Centre pek an nih bawk tur thu sawi bawkin a hnathawktu awmna tur In pawh V/C enkawlna hnuaiah mipuiin an sa ang a ti a. Sak zawh anih veleh Health Worker-in a luah nghal ang a ti.

Chief Minister chuan NLUP dawngtute enkawlzuina tur ‘Exit Protocol’ pawh ruahman fel vek anih tawh thu sawiin a hlawhtlinna chu a dawngtuteah a innghat ber a ni tih a sawi nawn a. Chuvangin NLUP dawngtute chu taimakna, rinawmna, dikna leh Pathian tihna nung nen an thawh a ngai a ni a ti a. NLUP tuipui em emtu AMFU te leh Lines Department ami te thawhrim zia sawi bawkin mahni hnaa tui lo mi thenkhat avanga duh anga kalchak pui a harsat thu a sawi bawk a ni.

Sekhum khua chu In 60 vel chauh ni mahse an hnathawh that avangin khaw ropui an ni a, Zoramin a entawn dawn a ni a ti. Sekhum khua hian NLUP hnuaia serthlum chin an thlang ber a ni. Lawmna inkhawm hi Pu Lalrintluanga, VCP-in a kaihruai a ni.

Chief Minister hi a nupui Pi Lal Riliani bakah bialtu MLA Pu PC Lalthanliana, Minister of State for Social Welfare, Pu Joseph Lalhimpuia, Vice Chairman, HPC, Lunglei, Pu K.Lalrinthanga, MLA, DC Lunglei leh NLUP Implementing Board hotuten an tawiawm a ni.