342/2026-2027

Dated Aizawl, the 30th April, 2026: Vawiin khan Conference Hall, Planning & Programme Implementation Department-ah Self Defense Training in Taekwondo for EMRS (Eklavaya Model Residential School) School Girls hawn a ni a. Kick off programme hi Social Welfare, Women & Child Development Department, Planning & Programme Implementation Department hnuaia EMRS Society leh MATA (Mizoram Amateur Taekwondo Association)-te tangho in an buatsaih a ni.

He hunah hian Pi Zoramthangi Chhangte, Director, Womenn & Child Development Dept. chuan kalkhawmte hnenah Beti Bachao Beti Padhao (BBBP) chungchang  sawiin, BBBP hnuaiah hian hmeichhe naupang hmasawnna turin Self Defense ( mahni invenna)  pek hi a ngaipawimawh hle a, taksa hriselna mai bakah rilru hriselna leh mahni inrintawkna a pe tel bawk tih a sawi. Hmeichhe naupang ten mahni inringtawk taka an inven theih chuan khawtlang a him mai ni lovin intluktlanna (equality) kawngah hmasawnna a nih theih thu a sawi.

BBBP hian thiltum paruk neiin, Sex Ratio at Birth tihsan te, Institutional Delivery tihsan te, kum tin 1% a 1st trimester ANC(Antenatal Care) registration tihsan te, Kum tin 1% a secondary enrolment tihsan te, Secondary leh Higher Secondary-a hmeichhe naupang school bang (drop out) rate endik te, Hmeichhe thi neih chungchanga inenkawl dan  (Menstrual Hygiene management) awareness te a ni. Heng a thiltumah te hian Mizoram chu hmasawnna tur la awm bawk mah se, dinhmun tha tak ah a awm thu a sawi bawk.

Dr. Lalrinchhana , Principal Adviser-cum-Additional Secretary, Planning & Programme Implementation Dept. chuan thu sawi bawkin, Programme for Self Defense Training in Taekwondo for EMRS School Girls chu hmalakna tha tak a nih thu a sawia, MATA-te nena thawhhona tha tak neih a, hmeichhia te dinhmun tha zawk a chawikanna a nih mai bakah, Taekwondo sport tan pawh hmasawnna kawng tha tak a nih theih tur thu a sawi a ni.

Self Defense Training in Taekwondo for EMRS School Girls hi National Society for Tribal Students (NESTS), Ministry of Tribal Affairs in a ngen angin, BBBP Scheme, Women & Child Development  Dept. atanga fund hmuh a ni a, MATA ten trainer tur buatsaihin, EMRS hmun hrang hrang 11- Lunglei,Serchhip,Lawngtlai,Ngopa,Tuipang,Chawngte,Tlangnuam,Tlungvel,Zawlnuam,Bilkhawthlir leh Noaohthlaha hmeichhia pawl VI-XII atanga zirlai naupang 1819-te tan training hi buatsaih a ni.

Pi Lalzarmawii, Commisioner & Secretary, Social Welfare,Women & Child Development Dept. kaihhhruaina in hun hi hman a ni a, MATA officials te mai bakah sawrkar lama hotu thenkhatte an tel a ni. Pu Lalhmingmawia Sailo, Programme Manager(A), Mizoram EMRS Society chuan lawmthu sawinain he hun hi a khar a ni.