341/2026-2027
Sesawng, the 30th April 2026: Hmar Peoples' Convention Democratic, Lalhmingthanga Sanate Faction te chu an ralthuamte tunga nunphung pangai zawh turin an rawn kir a. Vawiin khan hemi puala program pawimawh tak Sawrkarin a buatsaih chu Central Training Institute Parade Ground, Sesawngah Chief Minister Pu Lalduhoma chuan a hmanpui. He hunah hian Speaker Pu Lalbiakzama, Home Minister Pu K. Sapdanga leh Minister, MP (LS), Deputy Speaker, Adviser to CM leh MLA eng emaw zatin an tel bawk a ni.
Tun thla April ni 14 khan Mizoram sorkar leh HPCD Lalhmingthanga Sanate Faction te hian Sakawrdaiah inremna an ziak tawh a. Inremna an ziah thu sorkar thuchhuah pawh I&PR chuan a lo ti chhuak tawh a ni. Inremna angin vawiin hian an ralthuamte tunga an rawn kirna hun buatsaih a ni ta a ni.
Thusawiin Chief Minister chuan, Mizoram ralmuan thu kan sawi apianga kan rilru sira lo lang thin chu HPC (D) te an ni a. Anni nena inremna neih duhin inhawng takin kan indawr a. Kan Home Minister leh a thawhpuite an thawkrim hle a, an chungah lawmthu ka sawi a. Vawiin hi kan lo thleng ta a ni. Tunah chuan thinlung dam takin Mizoram chu state ralmuang tak a nih thu chhuang takin kan sawi thei tawh ang.
Mizo hnam zingah hian tumah Mizo hnam bik kan awm lova. Kan zavai hian Mizo kan ni. Vawiinah hian Mizo hnam chhunga hnam pengte hi mahni puala dinchhuah tuma beitu awm ta se, tumah an dinchhuah a rinawm loh. Chuvang chuan Mizo nihnaah hian kan lungawitlan a, kan inpumkhat hian kan dingchhuak zawk dawn a ni, a ti a. Inpumkhatna kawng zawh turin mi tinte a sawm.
Remna hlutzia hi sawifiah thiam a har hle a. Mizorama remna leh muanna a awm theih nana ka kalsan takte leh ka thil chante ka ngaihtuah a. Nunna hlutziate, ralmuan nawmziate ka ngaihtuah a. Remna man hi a to a ni. Vawiina ralthuam dahtute kan ngaihlu che u a, mi huaisente chauh hi an tlawm ngam thin a. Chung mi huaisen chu in ni. Mizo mipuite chuan helna hi kan ramah a lo chhuah leh kan remti tawh lo a. Chutiang ur chhuak thei thil reng reng hi chu tuman i ching tawh lo ila, helna leh innghirnghona ti chhuak thei thil reng reng lakah kan zain inthiarfihlim ang u. Vawi khat tlin ve duh vang maia innghirnghona ti chhuak thei policy leh ngaihdan neih hi bansan ila, kan ramah remna leh muanna tluantling nei zui zel turin i tangrual ang u, tiin mipuite a sawm a ni.
Home Minister Pu K. Sapdanga pawhin thusawiin, vawiin hi Mizoram tana ni chhinchhiahtlak a ni a. Inrema nei tura rawn chhuak HPC (D) (LF) Cadre te kan lo lawm che u a ni. He inremna lo thlen theih chhan bulpui chu inremna duh kan Chief Minister Pu Lalduhoma a ni a. Mizoramah remna a awm theih nana Central Service hna zahawm tawk tak bansantu kha a ni a. Vawiin thlengin remna a ngaihlu zui zel a, kan ram tan Remna Chhinchhiahna (Symbol of Peace) a tling a ni. Ram tana in rammut chhante ti hlawhtling turin state sorkar nen kan thawkho tawh dawn a, in nupui fanaute nen lungmuang takin awm ula, kan zain lungrual takin kan thawkho dawn nia, a ti.
Pu Lalbiakzama, Speaker pawhin thusawiin, Hmar Demand Area chhunga Ruling Party MLA awm chhun ka nih angin remna neih hi ka thupui ber pakhat a ni a. Hetia inremna a lo awm ta hi ka lawm em em a ni, a ti.
Pu Lalhmingthanga Sanate pawhin thusawiin, kalphung thar mipui sorkarah hian kan lengin kan hria a. Kan Chief Minister Pu Lalduhoma pawhin kan harsatnate min hrethiam niin kan ngai a. Unity Bridge min dawhsak nghal a, Mauchar kawng min siamsak a, kan bial hmasawnna tura a hmalakna dangte kan hmu a. Sorkar nen kan han indawr ta a ni.
Pu Lalmuanpuia Punte, Adviser to CM (Political) a thawkrim hle a, Pu Lalbiakzama, Speaker-in thahnem a ngai hle bawk a. Kan duh ang diak diak inremna chu hmu lo mahila lungawipui theih inremna nia kan ngaih avangin kan lo inrem ta a ni, a ti.
Home Coming & Arms Laying Ceremony hi Pastor Lalhmunsiama, ICI, Sesawng bialtu chuan hunserh a hmang a, Pu Vanlalmawia, Secretary, Home chuan inlawmna thu sawiin he program pawimawh tak hi tan a ni. HPC (D) (LF) Cadre ten an silai leh ralthuamte IGP Htrs Pu H. Ramthlengliana kutah an hlan a, Pu Stephen Lalrinawma, Sr. SP (CID) kaihhruaiin ralthuam lek tawh lo tura intiamna (Oath Taking) an nei zui a ni.
Pu Lalmuanpuia Punte, MLA, Adviser to CM chuan lawmthu sawiin inkhawm a khar a ni.
Kum 1986 a Peace Accord ziah a nih khan Hmar hnamten an beisei a phak lova ngaiin HPC an din ta a. Kum 1994 ah Mizoram sorkar nen an ziak a, Sinlung Hills Development Council a ding ta a. He inremnaa dam thei lo mi thenkhatin HPC(D) a din leh a, chuta an hruaitu hmasa ber chu Lalhmingthanga Sanate hi a ni. HPC(D) Pu H. Lalsangbera Faction lam chu sorkarin kum 2018 April thlaah inremna a neihpui a. Vawiina inremna a neihpui leh tak Pu Lalhmingthanga Sanate Faction hi kum 2024 atang khan inbiakna neihpui lehin, tum li inbiakna neih a nih hnuah inremna ziak a lo ni ta a. He ti hian Mizoramah hnam bil hel pawl an awm tawh lo nia hriat a ni.
