Vawiin khan Urban Development & Poverty Alleviation Department (UD&PA) chuan Aizawl Solar City Project chungchangah Seminar-cum-Workshop ,Aizawl Club-ah a buatsaih a, Solar City chungchang inhrilhfiahna leh zirhona an nei. UD&PA Minister, Pu Zodintluanga chu khuallian a ni a, Parliamentary Secretary, Pu Lal Thanzara chu khualzahawm niin he hun hi an hmanpui a ni.
He hun hmanpuitu, Khuallian UD&PA Minister, Pu Zodintluanga chuan Aizawlah ni zung chakna hmanga eng siamchhuah kan la hmang tam tawk lo tih sawiin, thingtlang lamah chuan Zoram Electrical Development Agency (ZEDA) hmalaknain an hman tam zawk thu a sawi a. Kawlphetha siamchhuah zel theih chi nilo (Non-renewable Energy)-a innghah chu a hautak bakah zawh hun nei a nih avangin, kawlphetha siamchhuah zel theih chi (Renewable energy) hmanna kawnga tan kan lak zual sauh sauh a pawimawh a ni, a ti. Sorkar department hrang hrangte chu ni zung chakna hmang tura inbuatsaih tura chahin, an Budget-ah pawh dah pawimawh hmasaka nei turin a sawm a. Vawikhat a bun man kan pek tawh chuan senso dang a ngailova, hman char char theih tawh a nih avangin electric bill a senso tam tak a phuhruk thei dawn a ni, a ti. Sorkar laipuia hmalak ngaite bawhzui kawngah leh Renewable Energy siam nana Project haichhuah kawngah sorkar Department hrang hrangte chu UD&PA Dept leh ZEDA te nena tangrual tura chahin, he Seminar-cum-Workshop hi a hawng a ni.
Khualzahawm, Parliamentary Secretary, Pu Lal Thanzara chuan khawvel hmasawnna thang zel hian power mamawh a tisang zuala, hei hian mihring tana boruak hlauhawm a siamchhuah phah zel a ni, a ti a. Hemi kawnga hmalaknan leh energy thianghlim hman a nih theih nan, MNRE chuan kum 2009-ah Aizawl chu Pilot Solar City atana a puan India rama khawpui 10 zingah telin, Master Plan thehluh a nih hnuah, July thla khan pawm a ni a. Hei hian ni zung chakna lam thil ngawr ngawr nilo, Renewable Energy leh energy efficiency a keng tel a ni, a ti. Solar City programme-in a tum ber chu tun atanga kum nga lo awm turah Aizawl khawpuiin kan mamwh tur hi 10% tala Renewable Energy leh energy efficiency lam atanga lo sut hek ve hi a ni, a ti a. Generator leh Non-renewable Energy-a kan innghahna te tihniama, Renewable energy hman tangkaina kawnga an hmalaknaah UD&PA Department leh Zoram Electrical Development Agency (ZEDA) te chu duhsakna a hlan bawk.
Inkhawm kaihruaitu, Principal Secretary, UD&PA, Pu R.L.Rinawma chuan he hun hi inhrilh hriatna atana buatsaih a ni thu a sawi a, chawhnu lamah hian Technical Session hun hman niin, Dr.Dharmaranjan Das, Director, (NER), MNRE chuan keynote address a sawia, Topic pathum, mi thiamte hnen atanga ngaihthlak a nih hnuah sawihonain a zuia, Director, UD&PA, Pu K.Lalthawmmawia, chuan lawmthu sawiin hun a khar a ni.
He hun hi Aizawl Municipal Council hruaitute, Local Council Association te, Mizoram Counsumer Union, residential school leh private hospital atangte, Renewable Energy lama inhmangte leh sorkar mi pawimawh thahnem takin an chhim a ni.
