Art & Culture Department leh Mizo Writers’ Association tangkawpa buatsaih ‘Seminar on Mizo Traditional Textile chu vawiin Archives Hall, Babutlang-ah neih a ni a, Art & Culture Minister Pu PC Zoram Sangliana -in Seminar hi a hawng a ni.

Seminar hawnna Art & Culture Director Pu Ngurbiaka kaihhruaiah hian Minister Pu PC Zoram Sangliana chuan Art & Culture Department leh Mizo Writers’ Association-in Mizo tualtah puan chi hrang hrang zira Semiar buatsaih a nih an tihtur awm tak tihna chang an hria a, kan hnam than zelna tura thil tangkai tak tur a ni, a ti. Sum leh pai, ei leh in thu ang bawka mihring thinlung luahtu leh kan engto em em chu silh leh fen thu hi a ni a, Mizote pawh hian hmakhawsang atangin silh leh fen thu hi lungkham leh engto em em kan ni. Kan pi leh pu te khan silh leh fen an lo nei chikim hle a, sik leh sa danglam anga thawmhnaw inbel tur an neih bakah an chhehvela thil awm nen a inzawm thuk em em a ni. Mizoten kan hnam incheina te hi kan roh tur ang leh kan ngaihsan tur ang hian kan rovin kan ngaisang thiam lo fo a, hnam incheina kan tihte hi ‘hnam identity’ kengtu leh pholangtu an ni tih kan hriat reng a pawimawh a ni, a ti bawk.

Vawiin Seminar-ah hian Mizote incheina leh tualtah puan chungchang Nl. Lisa Lalmuankimi Pachuau, Delhi University hnuaia Ph.D. (Fabric & Apparel Science) zir mek-in a sawi a. “Mizo puan par chi hrang hrang bul tan dan leh hmasawn zel dan” (Origin & Development of Mizo Traditional Textiles) tih thupui hmangin Pi Boichhingpuii, Director (Rtd.), Art & Culture leh “Mizo Silhfen tobul leh hmasawn zel dan” (Origin & Development of Mizo Costumes) tih thupui hmangin Pu B.Lalthangliana, President, Mizo Writers’ Association ten Paper an chhiar chhuak bawk a ni.