Assembly Speaker Pu R.Romawia leh Dy. Speaker Pu John Rotluangliana te chu Rajasthan khawpui Jaipur-a 21 - 24 September 2011 chhunga neih zawk tak ‘All India Presiding Officers Conference’ vawi 76-na ah an  tel a. Rampum huap conference ah hian state hrang hrang Speaker leh Dy. Speaker te an fuankhawm a ni.

He khawmpuiah hian state hrang hrang atanga lo kal Presiding Officers ten ram rorelna tha, changtlung leh felfai zawka awm theih nan siamthat ngaite siam tha a, hmasawnna atana rawtna te siamin, kalphung mumal taka awm theih nan uluk takin rorel dan kalphungte an zir hova. Mizoram Legislative Assembly Speaker Pu R.Romawia pawhin ‘The Role of the Legislature in Scrutinising & Making Laws of Good Governance’ leh ‘Determination of Maximum Period for Assent to Bills passed by the Legislature’ tih thupuite hmangin thu a sawi ve nghe nghe a ni.

India ram hi khawvela mipuite rorelna ram ropui ber te zing ami a nih angin, democarcy rorelna nghet leh changtlung zawk a awm zel theih nan rampum huap rorelna sang Lok Sabha Sectretariat kaihhruainain hetianga Presiding Officers Conference hi kum tinin Lok Sabha Speaker hovin an nei thin a ni. He conference-ah hian state hrang hrang Speaker ten anmahni state assembly rorelnaa an mamawh tur leh state dang assembly rorelna atana an thurawn te inhrilh tawnin rorel dan rualkhai zawk state tinah a awm theih nana hmalak dan tur te an thlirho a ni.