Tukin zing dar 7:00 khan Circuit House Conference Hall ah ni hnih cham a zin mek Vety Department Minister Pu Nihar Kanti Chakma leh Lunglei a cham mek HPC Vice Chairman Pu Joseph Lalhimpuia te chuan Lunglei Electric Veng rama sak tum Rural Slaughter House leh Integrated Dairy Development Plant (IDDP) chungchang te meeting chhawng hnih ah Department hotute, NGO hruaitute leh a kaihnawih Satalhtute leh Bawngvulhtute an sawi pui. Minister leh HPC Vice Chairman te hi Vety Department Secretary Pu T.Sangkunga, Vety Director Dr. L.B.Sailo leh Registrar, Mizoram Vetenary Council Pu Saingura ten an tawiawm a, nimin chawhnu dar 2:30 khan Slaughter House sakna tur hmun chu tlawh nghal a ni.

Sawrkar hotute chuan Rural Slaughter House sakna a tulna chhan chu sathianghlim leh hrisel mipui tan a awm theih nan te, ran leh sa hrisello atanga kai theih natna kan vei zinga tam ber te laka in ven nan leh sawrkar duhdan anga ran na tuar lova talh leh thianghlim zawka sawngbawl a nih theih nan a ni.Bawnghnute supply indaih lohna nasa tak tih ziaawm nan leh Lunglei chhehvel bakah Lawngtlai leh Saiha thlenga Bawnghnute supply a nih theih nan Lunglei ah Integrated Dairy Development Plant din sawrkarin a tum a, he IDDP din tum hi Lunglei a Primary Society members ten an registration an renew hun ah chak taka hma lak nghal tum a ni a, hlawhtling thei turah sawrkarin a ngai a ni tih vety Minister chuan a sawi. Meeting hmasa zawk an neih IDDP chungchang ngaih tuahna ah hian Lunglei a Dairy Farmers hruaituten harsatna an tawh dan leh rawtna te an thlen chu Department hotute leh Co-operation hotute chuan bawhzui sak an tiam a ni. Slaughter House sakna hmun tur sawihona ah pawh satalh hruaitute leh NGO hotute chuan lungsi taka Slaughter House sak tumna hmun chu an pawm thlap thu an sawi a ni.Satalh pawl hruaitute harsatna thlen pakhat Burma bawngkai te hnen atanga sawrkar department thenkhat a official duty ten pawisa tam tak gate tin ah an lo chawi luihtir thin chuan sawrkar thuneitu te beng a verh hle a ni. Satalh tute chuan heng harsatna avang te hian ran man a sang a, sa talh a eizawn a hautak thu an sawi.

Vety Department record in a tarlan dan chuan Lunglei town area ah Dairy farmer 428 awmin nitin litre 2148 ang hu bawnghnute an thar chhuak a nikhat ah litre 960 bak District Milk Plant hian a dawn theih loh thu tarlan a ni. Slaughter House sak nan hian NABARD atangin loan cheng vaibelchhe 2.3 peih fel anih tawh thu Dr.L.B. Sailo, Director AH& Vety chuan a sawi. Minister leh Secretary te hian nimin chawhnu dar 1:30 khan District Vety Official te kokhawm in hmalak dan tur leh District Office tih changtlun dan tur te an sawipui bawk a ni.