Vawiin khan Chanmari, YMA Hall-ah Central YMA leh Mizoram SSA Mission buatsaihin ‘Seminar on Right to Education & Continuous and Comprehensive Evaluation (CCE)’ neih a ni a, Pu Lalsawta, School Education Minister in a hmanpui.

He hun hmanpuitu Pu Lalsawta, School Education Minister chuan zirna siamthatna kawnga Central YMA te nena thawhhona tha tak an nei chu lawmawm a tih thu a sawi a. Hma an lakna kawng hrang hrangah huaisen a ngaih thu leh dik taka kal a ngaih dawn chuan mi dangte huat hlawh mai a awl thu leh tunah hian Zirna siam tha turin chak taka hma lak a nih thu a sawi a. Mizoramin zirna lama hma a sawn chhoh zelna atan Polytechnic paruk neih thar a nih tur thu te, School Education Service buatsaih a nih tur thu leh chumi atan ruahmanna chak taka kal pui mek a nih thu a sawi bawk. Zirtirtu thawk lai mekte hi an tling tawk a, zirna siam tha tur hian anni lo hi an awm chuang lova, zirtirtute chu an hnathawh that te sawrkarin a hriatpui a ni, a ti. Tunah hian kan ramah hian mi fel, mi tha tam tak an awm thu leh zirna siam tha tur hian theihtawp chhuahin, kan la ding chhuak thei a ni, a ti bawk.

Pu T. Sangkunga, Central YMA President pawhin vawiin Seminar-a lo tel te chu an thil zir leh hriat thar tur, mithiamin an sawite ngaithla ngun a pawm thiam turin a chah a. Central YMA chuan zirna a ngaih pawimawh thu leh kumpuan ‘Ram leh Hnam Humhalh’-ah pawh hmalakna lian ber pakhat chu zirna siam that a ni, a ti bawk.

Pu Lalhmachhuana, State Project Director, Mizoram SSA Mission hnen atangin “The Right of Children to Free and Compulsory Education” leh Pi D. Ramdinthangi, Dy. Director, SCERT atangin CCE chungchang sawifiahna ngaihthlak a ni.

He Seminar hi Pu Lalbiakzuala, Vice President, Central YMA in a kaihruai a, Mizoram SSA lam atangin Officer, Central YMA atangin Executive Committee Member ten an tel pui bakah Aizawl Khawpui chhunga Primary School leh Middle School bakah YMA branch tin aiawh pakhat (1) theuh an tel a ni.