April Ni 17-a NLUP Nodal Minister Pu H.Liansailova hova meeting thu rel bawh zuiin vawiin khan NLUP Implementing Board Vice Chairman, Pu P.L.Thanga hovin RKVY hnuaia captive plantation kalpui na tura Implementing agency hrang hrang te beneficiary insem dan tur leh an bial huam chin tur chungchang ngaihtuahin NIB conference hall-ah meeting neih a ni a. RKVY nodal department Agriculture bakah Horticulture department, MIFCO leh Frontus aiawh te an tel a ni.

Chhingchhip-a MIFCO thei sawngbawlna khawl tuai thar leh tih changtlun nan NLUP atangin sum tam tak bel a ni tawh a. He khawl chawm tur hian khaw 41 ah chhungkaw 2500 vel sapthei leh lakhuihthei chintir an ni dawn a ni. Scheme hrang hrang hnuaia hmalakna te a inthuah loh nan ruahmanna siam a ni. Captive plantation kalpuina tur hian RKVY sum 1.31 crore dah a ni a. A matching share hi NLUP sum atanga tum turin ruahman a ni.