Mizoram Youth Commission Chairman Pu Hmingdailova Khiangte, Tuirial Bialtu MLA ni bawk chuan Hortoki khua mipui te tui thianghlim In tur lak nan Mizoram-a Tuialhthei zawngtu ONGC ten cheng Nuai 88 pawisa an pe chhuak tawh a. PHE Deptt enpuina hnuaiah hna thawh a ni ang, a ti.

He thu hi vawiin-a Hortoki GSA te buatsaih Football Tournament a hawnna, Hortoki Playground ah sawiin Pu Hmingdailova Khiangte chuan Hortoki hian kham khawp tui an neih loh thin chu hrethiam in Chief Minister Pu Lal Thanhawlan a buaipui sak a, tunah chuan a hlawhtlinna hmuh tur a awm dawn ta a ni, a ti. Kawnpui leh Hortoki inkar kawng 18 kms a thui chhe lutuk tawh siam that nan Sawrkar chuan cheng Nuai 350 Special Plan Assistance (SPA) hnuaiah a dah a; mahse tunah hian K Deposit ah a awm rih a. Hei pawh hi Sawrkar chuan hman theih dan kawng a zawng mek a ni, a ti bawk.

Sawrkar laipui atanga sum hmuh Inland Water Transport hnuaiah Bairabi atanga Lawng kawng siam chu zawh fel a ni tawh a. Hei hian thlai thar phurh chhuah kawngah nasa takin mipui te a chhawk dawn a. Tunah phei chuan State sawrkar in Hortoki chu Seed Village (Thlai chi siamna khua) tiin a puang tawh a; Agriculture Deptt kaltlangin Thlai chi leikhawm mek a ni, a ti bawk.

Pu Hmingdailova Khiangte hian Hortoki khua Zirtirtu te kawmin Zirna kawnga sawrkar in thahnem a ngaihzia a sawipui a ni.