Sports and Youth Services Department-in a vawikhatna atan ni li awh tur (April 22 -26) thalai te puala Youth Festival a buatsaih chu vawiin chawhnu khan Multipurpose Cultural Complex, Beraw Tlang-ah a hawnna programme neih a ni a, Health Minister Pu Lalrinliana Sailo chuan Festival hi a hawng a ni.
Pu Lalrinliana Sailo chuan tunlai khawvel thang chho mekin a ken tel - changkanna in Mizoram pawh chak takin a tuam mek a tiin, heng changkanna thil hrang hrang te hi a bikin thalai ten an hman tangkai thiam a tul thu a sawi a. Mizoram chu Bangladesh leh Myanmar te an karcheh avangin insumdawn tawnna lamah kawng zau tak a in hawn mek thu sawiin, hei hian thalai te tan hnathawh tur tam tak a siam sak thei a ni, a ti a. Multi Modal Multi Modal Project a puitlin hunah phei chuan Mizoram kaltlangin Asia khawmual Chhimchak (South East Asia) te nen insumdawn tawnna a lian hle dawn a tiin hemi atan hian tuna atanga rilru zau taka pu chunga inpuahchah a tul thu a sawi lang bawk.
Tunlai thalai te chu an chhuanawm hle a, an vannei bawka tiin Health Minister chuan kawng dik an zawh chuan ram leh hnam tan malsawmna hnar a ni thei a ni, a ti. Thalai kalkawm te chu zuk leh hmuam lakah te, ruihtheih thil lakah te leh mipat hmeichhiatna lamah te fihlim a, taimakna, tuarchelna, dikna, thawhrimna leh ram hmangaihna te an nunah theuh seng lut turin a chah a. Youth Festival chu Mizoram mai ni lo Mizoram pawn thlenga tangkai taka an hman theih nan duhsakna a hlan bawk a ni.
Programme kaihruaitu Sports & Youth Services Director, Pu Lalzirmawia Chhangte chuan Festival pianchhuah dan te sawiin Festival in a tum te a tarlang a. Festival hman tum dan chanchin tlangpui chu Pi Lalengvari, Supt. SYS Department in a sawi bawk a ni. Youth Festival hi Sawrkar laipuia Ministry of Sports & Youth Services in an sponsored a ni a.
Festival ah hian District hrang hranga zirna in sawmbik atangin sikul naupang mipa 195 leh hmeichhia 133 te an tel a. He festival-ah hian Mizo infiamna chi hrang hrang ah te inelna siam a ni dawn a. Adventure activities te, Intellectual leh Arts programme te, lemziah leh thalak lamah intihsiaknate leh AIDS/HIV awareness programme te neih a ni dawn a ni.
