Vawiin khan I&PR Conference Hall, Mamit-ah Zawlnuam ICDS hnuaia Anganwadi Worker te tan Sensitazation Training nikhat  awh  neih a ni. Pu Jacob Lalawmpuia Addl DC chuan khuallian niin a hmanpui.

He hun hmanpuitu Pu Jacob Lalawmpuia Addl DC chuan  Pradhan Mantri Matru Vandana Yojana (PMMVY) chu nu naupai te enkawlna tha zawk an dawn theihna tura duanchhuah a nih thu sawiin, tun hmalamah chuan  mizo te zingah hmeichhia naupai laite ngaihsak an hlawh tawk lo hle a, fatir phei chu dam tur lo hiala ngaihdan nget tak nei thin kan ni, tunah chuan sorkar laipui hmalakna a zarah leh kan nunphung pawhin chankan lam a pan chhoh ve mek zel avangin nu naupaite ngaihsak leh duat an hlawh chho ve ta a ni a ti.

Anganwadi worker te chu an hna hre chianga midangte tana malsawmna thlentu ni a, hna hniam a ni emaw a sang a ni emaw kan mawhphurhna hriat chiana lungawi tak leh thahnem ngai taka thawka turin a chah a ni.

Pu Lalhmingmawia Sailo, District Programme Coordinator (PMMVY) chuan Pradhan Mantru Vandana Yojana hnuaia nu naupai laite tana hamthatna awm thei hrang hrangte chipchiar zawkin sawizauna a nei a ni.

Training hi Pi C. Lalrinpuii, District Programme Officer (ICDS) Mamit chuan kaihruaia, Dr Zothankhuma Chief Medical Officer, Mamit pawhin thusawiin Anganwadi Worker te chu an pawimawhna hre thar tura fuihin nu naupai laite dap chhuah kawngah leh nu naupaite tana hriselna pawimawh zia zirtir uar turin a chah bawk a ni.

Pradhan Mantri Matru Vandana Yojana(PMMVY) hnuaia hian Mamit District chhungah Nu Raipuar 126 te tanpuina pek an ni tawh a. He tanpuina dawng thei turte hi 1.1.2017 hnulama fa hmasa ber paite tan tum khat tanpuina dawn theih a ni, he mi chungchang hre chiang duh tan Mamit District hnuaia Anganwadi Centre zawng zawngah leh Social Welfare Department /ICDS Project CDPO leh DPO Office ah te form laka zawhfiah theih reng a ni.

Vawiin trainingah hian Zawlnuam ICDS hnuaia Anganwadi Worker te an tel a ni.