Vawiin chawhma khan Mizoram Science Technology and Innovation Council (MISTIC) hnuaia State Climate Change Cell buatsaihin Secretariat Conference Hall, Mizoram Secretariat Complex-ah sik leh sa inthlak dan zirho na hun hman a ni.
He hunah hian sik leh sa chungchang a sawrkar hmalakna thenkhat te inhrilh hriatna leh sawi hona hun hman a ni a. State Action Plan on Climate Change (SAPCC) ennawnna tur atana pawimawh tak lehkhabu ‘Climate Profile of Mizoram’ chu tlangzarh niin, hemi workshop chhim tur a kal te hnenah hian sem a ni bawk a ni. Tuihna pawimawhna te, sik leh sa inthlak danglam thut vang a lo neihdan danglam dan te leh chhiatrupna (disaster) a thlen theih dan te zir ho a ni a. Dr. James Lalnunzira, Scientific Officer chuan Kum 32 (1986-2017) chhung a Mizoram a ruahtui leh khawlum leh vawt danglam dan paper a present a. Mizoram ruahtui hi kum tin 5.22mm in a tlahniam a, kum 2007 khan ruahtui (3121.86 mm) a tam ber a, Kum 2014 khan ruahtui (1936.83mm) a tlem ber thung a ni. Lunglei District-ah (3204.73 mm) ruahtui a tam ber a, Champhai District-ah (1534.6mm) ruahtui a tlem ber thung a ni. Khawlum dan hi Kum 32 chhung hian kum tin 0.03°C in a tla hniam a ni.
Technical Session hi Dr K. Kire, Additional PCCF leh Nodal Officer (Climate Change) chuan a kaihruai a. Hemi hun hi Dr. C.Vanlalramsanga, Secretary, Planning (Science & Technology), Prof. Lalnuntluanga, Dr. John Zothanzama, sawrkar department aiawhte, tlawmngai pawl aiawhte’n an tel pui a ni.
