Vawiin khan Mizoram sorkar Finance Department leh Central Sorkar hnuaia Pension Fund Regulatory & Development Authority (PFRDA), New Delhi te tangkawpin Private Sector Units/ Autonomous Bodies/ Deficit Schools & Colleges/ Contract & MR hnathawk te tana sorkarin rampum huapa New Pension System-Lite (NPS-Lite) a ruahman chungchang hrilhhriatna leh zirhona ‘Sensitization Workshop on NPS-Lite for Unorganised Workers & Employees’ chu Aijal Club-ah buatsaih a ni a. He Workshop-ah hian Mizoram sorkar aiawhin Finance Commissioner Pu Lalmalsawma, Secretary Finance Pu Lalthansanga te bakah PFRDA Chairman Pu Yogesh Agarwal leh PFRDA Chief General Manager Pushkal Upadhyay ten sorkar hnathawk nghet leh a nghet lova thawkte tana sorkarin pension scheme thar a siam hrang hrang chungchang an hrilhfiah a ni.

New Pension System-Lite hi Pension Fund Regulatory & Development Authroity (PFRDA) scheme siam a ni a. Mizoramah chuan ‘The Mizoram New Contirbutory Pension for Unorganised Employees & Workers (NPS-LITE) Scheme 2010’ tia vuah a ni . Sorkar hnathawk nghet ten pension scheme an neih ang nei ve lote tana siam, NPS-Lite Scheme hmang thei turte chu - 1) Sorkar office/department hnuaia Contract leh Muster Roll employees, 2) Deficit school, college leh zirna in dang hnuaia hnathawktute, hun khaih lak ni lo, hun rei deuh chhunga atana thawk te leh 3) Autonomous Body, Public Sector Undertaking/ Board/ Authority hnuaia thawktu pension emaw provident fund scheme nei si lote an ni a. NPS-Lite hi kum 18-60 inkar tan niin a tel duh tan a ni a, tihluihna thil a ni lo.

Mizoram sorkarin 1 September, 2010 hnua sorkar hnathawk ngheta lut zawng zawngte tan New Pension System (NPS) a hmang tan ang bawkin NPS-LITE hi nghet lova thawkte tan pension hnua lak chhuah tura sum khawlna a ni ber a. NPS-LITE subscribe duhte chuan an dahluh tur zat an thlang thei a, Rs.10/- atanga tanin Rs.10 bi (denomination) zela tih tam theih a ni a, a tam lam chu mahni inhuam dan ang a ni. Amaherawhchu NPS hnuaia sorkar hnathawkte tan sorkarin matching share a dahluh ve tur ang erawh chu NPS-LITE hnuaiah chuan sorkarin matching share a pe ve dawn lo a ni.

Sorkar Laipuiin mi chanhai leh hna hnuaihnung thawkte tan erawh a bik taka a duan ‘Swavalamban Scheme’ hnuaiah chuan a hmang duhten kum khatah Rs.1000 - 1200 an dahlut laiin sorkarin matching share kum tin Rs.1000/- a dahluh sak ve dawn thung dawn a ni. He Swavalamban Scheme hi subscriber-in NPS-LITE a zawm tan atanga kum 4 chhung atan chauh a ni phawt ang.

Vawiina Workshop-ah hian Mizoram sorkar hnuaia Department aiawh an tel kim tha hle a, NPS-LITE chungchang sawiho zauna neih a nih hnuin Chief Controller of Accounts Pu Lalropara’n lawm thu sawiin hun a khar a ni.