Vawiin chawhnu dar 1.30 khan Aizawl DC pisaah Election Commission of India thupek anga Electoral Rolls ennawnna kal mek chungchangah District Level Standing Committee chu an thukhawm a; meeting hi Aizawl DC leh District Election Officer ni bawk Pu Subhir Singh chuan a kaihruai a; member-te an kal kim hle.

Special Summary Revision-ah hian 1.1.2012 chu tehfunga hman tur a ni a; hemi huna kum 18 tlingte chu electoral roll-ah ziah luh theih an ni ang a; hemi rual vek hian mitthi leh pem te chungchang pawh chinfel nghal a ni dawn a ni. Electoral roll-a inziak lut thar turte chuan dilna form-ah passport-size thlalak bel vek tur a ni bawk ang. Electoral roll-a thun dilna lehkha hi 1.11.2011 thleng mahni bialtu ERO/AERO/BLO/DO hnenah emaw thehluh theih a ni a; 18.11.2011 thlengin endik hna thawh a ni ang a, hetah hian Local Council /VC te, NGO te leh political party aiawhte pawh tel vek tura hriattir an ni ang. Electoral roll-a thun tharte leh an dilna hnawlsakte chu Aizawl DC pisaa Election Branch-in a hriattir ang.